ਨੇਕੀ ਬਦੀ, ਸ਼ਤਾਨ ਫ਼ਰਿਸ਼ਤੇ,

ਕੋਈ ਜਿੱਤੇ ਕੋਈ ਹਾਰੇ;

ਵੱਗਣ ਹੜ੍ਹ ਹੰਝੂਆਂ ਦੇ ਭਾਰੇ,

ਹੋਵਣ ਲਹੂਆਂ ਦੇ ਘਲੂਘਾਰੇ;

ਵੱਡਾ ਰੱਬ ਕੋਈ ਦਖ਼ਲ ਨਾ ਦੇਵੇ,

ਬੈਠਾ ਰਹੇ ਕਿਨਾਰੇ ।

ਬਾਬੇ ਨਾਨਕ ਸਚ ਫਰਮਾਇਆ:

"ਏਤੀ ਮਾਰ ਪਈ ਕੁਰਲਾਣੇ

ਤੈਂ ਕੀ ਦਰਦੁ ਨਾ ਆਇਆ ?"

 

ਨਿੱਕੀ ਜਿਹੀ ਜਿੰਦ ਮੇਰੀ ਤਾਹੀਉਂ

ਨਿੱਕੇ ਰੱਬ ਨਾਲ ਪਾਇਆ ਪਿਆਰ ।

ਨਿੱਕੇ ਰੱਬ ਦੀਆਂ ਨਿੱਕੀਆਂ ਗੱਲਾਂ,

ਨਿੱਕੇ ਰੋਸੇ, ਨਿੱਕੇ ਹਾਸੇ,

ਨਿੱਕੇ ਉਹਲੇ, ਨਿੱਕੇ ਦਲਾਸੇ,

ਬਣਦੇ ਜੀਵਨ ਦਾ ਆਧਾਰ ।

ਲੱਗੇਗਾ ਇਹ ਕੁਫ਼ਰ ਜ਼ਰੂਰ,

ਐਪਰ ਕੁਫ਼ਰ ਮੇਰਾ ਮਜ਼ਬੂਰ ।