ਸਾਥ

ਛੋਹ ਤੇਰੀ ਚੰਨਾ ਝੋਲ਼ੀ ਚਾਨਣਾਂ 'ਨਾ ਭਰੂਗੀ

ਤੇਰੀ ਮੇਰੀ ਗੱਲ ਤਾਂ ਹਵਾਵਾਂ ਵਿਚ ਤਰੂਗੀ

 

ਖੁੱਲ੍ਹਾ ਆਸਮਾਨ ਸਾਡਾ ਦਰ ਬਣ ਜਾਊਗਾ

ਜਿੱਥੇ ਨਾਲ ਬੈਠੇਗਾ ਵੇ ਘਰ ਬਣ ਜਾਊਗਾ

ਸਾਥ ਤੇਰੇ ਵਿਚ ਜਿੰਦ ਹਰ ਦੁੱਖ ਜਰੂਗੀ

ਤੇਰੀ ਮੇਰੀ ਗੱਲ ਤਾਂ ਹਵਾਵਾਂ ਵਿਚ ਤਰੂਗੀ

 

ਹਿੱਸੇ ਸਾਡੇ ਆਇਆ ਭਾਵੇਂ ਧੁੱਪਾਂ ਵਾਲਾ ਦੇਸ ਵੇ

ਭਾਲ ਕਿਤੇ ਛਾਵਾਂ ਖੁੱਲ੍ਹੇ ਗੁੰਦਲਾਂਗੇ ਕੇਸ ਵੇ

ਸਾਡੀਆਂ ਤਾਂ ਕੋਸ਼ਸ਼ਾਂ ਤੋਂ ਔਂਕੜ ਵੀ ਡਰੂਗੀ

ਤੇਰੀ ਮੇਰੀ ਗੱਲ ਤਾਂ ਹਵਾਵਾਂ ਵਿਚ ਤਰੂਗੀ

 

ਖ਼ਾਲੀ ਜੇਬ ਆਪਾਂ ਹਾਸਿਆਂ 'ਨਾ ਭਰ ਲਵਾਂਗੇ

'ਛੋਟੀ' ਉੱਤੇ ਮਿਹਨਤਾਂ ਦੀ ਛਾਂ ਕਰ ਲਵਾਂਗੇ

ਸਾਡੇ ਲਈ ਦੁਆਵਾਂ ਕੁੱਲ ਕਾਇਨਾਤ ਕਰੂਗੀ

ਤੇਰੀ ਮੇਰੀ ਗੱਲ ਤਾਂ ਹਵਾਵਾਂ ਵਿਚ ਤਰੂਗੀ

 

ਰਲ਼-ਮਿਲ ਕੱਟਲਾਂਗੇ ਜ਼ਿੰਦਗੀ ਦੀ ਵਾਟ ਵੇ

ਤੇਰੇ ਸੰਗ ਪੂਰੀ, ਮੇਰੀ ਹਰ ਇੱਕ ਘਾਟ ਵੇ

ਤਪਦੀ ਦੁਪਹਿਰ ਤੇਰੇ ਸੀਨੇ ਲੱਗ ਠਰੂਗੀ

ਤੇਰੀ ਮੇਰੀ ਗੱਲ ਤਾਂ ਹਵਾਵਾਂ ਵਿਚ ਤਰੂਗੀ