ਰੱਬੀਆ-੨

ਤੇਰੇ ਆਉਣ 'ਤੇ ਟਹਿਕਣ ਲੱਗਪੇ ਉਮਰ ਦੇ ਰੰਗ ਉਦਾਸੇ

ਪਾਣੀ ਲੱਗਪੇ ਗਾਉਣ ਤੇ ਪੌਣਾਂ ਵੰਡਦੀਆਂ ਫਿਰਨ ਪਤਾਸੇ

ਤੇਰੇ ਆਉਣ 'ਤੇ ਆਈਆਂ ਕਣੀਆਂ ਟੁੱਟਗੇ ਕੁੱਲ ਚੁਮਾਸੇ

ਮੁਸਕਣੀ ਤੇਰੀ ਘੋਲ਼ ਦਿੱਤੇ ਨੇ ਸਭ ਗੱਲਾਂ ਵਿਚ ਹਾਸੇ

 

ਹੁਣ ਸਾਡੀ ਹਰ ਮਰਜ਼ ਦਾ ਦਾਰੂ ਕੋਲ ਤੇਰੇ ਹੀ ਮਿਲਦਾ

ਵੇ ਅਜਨਬੀਆ ਰੱਬੀਆ, ਮਹਿਰਮ ਬਣ ਬੈਠੈ ਤੂੰ ਦਿਲ ਦਾ

ਛੋਹ ਤੇਰੀ 'ਨਾ ਚੁੱਕੀ ਫਿਰੀਏ ਕਵਿਤਾ, ਕਿੱਸੇ, ਕਲਮਾਂ

ਨਜ਼ਰ ਤੇਰੀ ਨਾ ਹੋਵੇ ਸਾਥੋਂ ਅੱਖਰ ਵੀ ਨਈਂ ਹਿੱਲਦਾ

ਅੱਜ ਫੁੱਲਾਂ ਦੀ ਮਹਿਕ 'ਚ ਰਲ਼ਕੇ ਧਰਤੀ ਮਹਿਕ ਖਿੰਡਾਵੇ

ਵੇ ਚਾਨਣ ਦੇ ਵਰਗਿਆ ਤੇਰੀ ਤਾਬ ਝੱਲੀ ਨਾ ਜਾਵੇ

ਗਲ-ਗਲ ਆਈਆਂ ਖੁਸ਼ੀਆਂ ਨੂੰ ਮੈਂ ਕਿਦਾਂ ਰੱਖਾਂ ਡੱਕ ਕੇ

ਵਿਹੜੇ ਸਾਡੇ ਚੜ੍ਹਿਆ ਸੂਰਜ ਸੰਗੀ ਜਾਵਾਂ ਦੱਸ ਕੇ

 

ਰੌਸ਼ਨ-ਰੌਸ਼ਨ ਹੋ ਗਈ ਰੂਹ, ਦੇਹ ਲੈਂਦੀ ਕਨਸੋਅ ਵੇ

ਮੇਰੇ ਸੀਨੇ ਦੇ ਵਿਚ ਬਲ਼ ਪਈ ਨਾਮ ਤੇਰੇ ਦੀ ਲੋਅ ਵੇ

ਮੈਂ ਦੀਵਾ, ਮੈਂ ਬਾਤੀ, ਮੈਂ ਹੀ ਹੀਰ ਤੇ ਰਾਂਝਾ ਹੋਈ

ਆਉਂਦਾ ਰਹੀਂ ਤੂੰ ਚਾਨਣ ਰੰਗਿਆ ਸੁਣ ਸਾਡੀ ਅਰਜ਼ੋਈ