ਵਸਲ

ਖੌਰੇ ਕਿਹੜੇ ਜਨਮਾਂ ਦੇ

ਵਿਛੜੇ ਮਿਲੇ ਹਾਂ

ਕੀਤਾ ਲੇਖਾਂ ਦਾ ਸਵਾਲ ਰੱਬ ਹੱਲ ਵੇ

ਸਾਨੂੰ ਰਾਸ ਆਗੀ

ਤੇਰੇ ਪਿਆਰ ਦੀ ਤਾਮੀਲ

ਜਿੰਦ ਬਿਨਾਂ ਤੇਰੇ ਕੱਟਦੀ ਨਾ ਪਲ ਵੇ

 

ਅੱਖਾਂ ਨੂੰ ਏ ਯਾਦ

ਇਕੋ ਦੀਦ ਦੀ ਨਮਾਜ਼

ਸੀਨੇ ਵਸਲਾਂ ਦੇ ਗੂੰਜਦੇ ਨੇ ਟੱਲ ਵੇ

ਲੱਖਾਂ ਹੀ ਨਿਆਮਤਾਂ ਤੋਂ

ਚੰਗਾ ਲੱਗੇ ਸਾਨੂੰ

ਤੇਰਾ, ਝੂਠੀਆਂ ਗੱਲਾਂ ਦਾ, ਸੁੱਚਾ ਝੱਲ ਵੇ

 

ਆਕੜਾਂ 'ਚ ਭਿੱਜੇ ਅਸੀਂ

ਆਪਣੇ 'ਚ ਰੁੱਝੇ

ਕੁੱਲ ਦੁਨੀਆਂ ਨੂੰ ਜਾਣਦੇ ਸਾਂ ਡੱਲ ਵੇ

ਸਿਖ਼ਰ ਦੁਪਹਿਰੇ

ਸਾਡੇ ਮਾਣ ਦੇ ਚਉਬਾਰੇ

ਤੇਰੇ ਇਸ਼ਕੇ ਦਾ ਢਾਅ ਗਿਆ ਈ ਮੱਲ੍ਹ ਵੇ