ਚਾਅ

ਦਿਲ ਵਿਚ ਦੱਬੀਆਂ ਜੋ

ਗੱਲਾਂ ਸਭ ਕਹਿਣ ਦਾ

ਸਾਨੂੰ ਕਿਹੜਾ ਚਾਅ ਨਹੀਂ ਵੇ

ਤੇਰੇ ਕੋਲ ਬਹਿਣ ਦਾ

 

ਹਾਲੇ ਤੇਰੀ ਵਾਜ ਬਸ ਕੰਨੀਂ ਰਸ ਘੋਲ਼ਦੀ ਏ

ਬੋਲਣੇ ਨੂੰ ਫੋਟੋ ਤੇਰੀ ਬੜਾ ਕੁਝ ਬੋਲਦੀ ਏ

ਫੁੱਲਾਂ ਵਾਂਗੂ ਮਹਿਕਦੇ ਦਾ ਹੱਥ ਫੜ੍ਹ ਲੈਣ ਦਾ

ਸਾਨੂੰ ਕਿਹੜਾ ਚਾਅ ਨਹੀਂ ਵੇ ਤੇਰੇ ਕੋਲ ਬਹਿਣ ਦਾ

 

ਢੋਅ ਲਈ ਬਥੇਰੀ ਚੰਨਾਂ ਦੁੱਖਾਂ ਵਾਲ਼ੀ ਪੰਡ ਵੇ

ਘੋਲ਼ ਦੇ ਉਦਾਸੀਆਂ 'ਚ ਹਾਸਿਆਂ ਦੀ ਖੰਡ ਵੇ

ਮੁੱਕ ਗਿਆ ਜੇਰਾ ਹੁਣ ਦੂਰੀਆਂ ਨੂੰ ਸਹਿਣ ਦਾ

ਸਾਨੂੰ ਕਿਹੜਾ ਚਾਅ ਨਹੀਂ ਵੇ ਤੇਰੇ ਕੋਲ ਬਹਿਣ ਦਾ

 

ਰੀਝਾਂ ਵਿਚ ਰੰਗੀ-ਰੰਗੀ ਡੁੱਬੀ-ਡੁੱਬੀ ਸ਼ਾਮ ਦਾ

ਸਾਡੇ ਕੋਲੇ ਰੰਗ ਮਾਹੀਆ ਇਕੋ ਤੇਰੇ ਨਾਮ ਦਾ

ਰੱਖਿਆ ਛੁਪਾ ਕੇ ਤੂੰ ਹੀ ਪਤਾ ਮੇਰੇ ਚੈਨ ਦਾ

ਸਾਨੂੰ ਕਿਹੜਾ ਚਾਅ ਨਹੀਂ ਵੇ ਤੇਰੇ ਕੋਲ ਬਹਿਣ ਦਾ