ਰੀਝ ਦੇ ਝੱਗੇ

ਝੁਮਕੇ ਪਾ ਕੇ ਆਈ ਤਿਤਲੀ

ਧੁੱਪ ਮਜਾਜਣ ਨਾ ਕੇ ਨਿਕਲੀ

ਰਲ਼ ਰੁੱਖਾਂ ਨੇ ਸਰਗਮ ਗਾਈ

ਆ ਲੈ ਪੌਣ ਠੁਮਕਦੀ ਆਈ

ਛਾਵਾਂ ਨੂੰ ਚੜ੍ਹੀਆਂ ਫਿਰਨ ਖ਼ੁਮਾਰੀਆਂ

ਨੀਂ ਸਾਨੂੰ ਇਹ ਰੁੱਤਾਂ ਬਹੁਤ ਪਿਆਰੀਆਂ

 

ਰੰਗਾਂ ਦੇ ਵਿਚ ਮੌਲੇ ਧਰਤੀ

ਮੌਲੇ, ਧੀਮਾ ਬੋਲੇ ਧਰਤੀ

ਨੀਝਾਂ ਲਾ ਲਾ ਤੱਕੇ ਅੰਬਰ

ਤੱਕੇ ਪਰ ਨਾ ਥੱਕੇ ਅੰਬਰ

ਖੋਲ੍ਹ ਕੇ ਬੈਠੇ ਚੱਤੋ-ਪਹਿਰ ਹੀ ਬਾਰੀਆਂ

ਨੀਂ ਸਾਨੂੰ ਇਹ ਰੁੱਤਾਂ ਬਹੁਤ ਪਿਆਰੀਆਂ

 

ਖੁਸ਼ਬੂਆਂ ਨੇ ਟਹਿਕਣ ਲਾਇਆ

ਆਲ ਦੁਆਲਾ ਮਹਿਕਣ ਲਾਇਆ

ਕਾਟੋ ਨੂੰ ਵੀ ਪਤਾ ਨਾ ਲੱਗੇ

ਕਿਹੜੀ ਖਾਵੇ ਕਿਹੜੀ ਛੱਡੇ

ਅੰਮੜੀ, ਚੀਜ਼ਾਂ ਖਾਣ ਨੂੰ ਕਈ ਖਿਲਾਰਈਆਂ

ਨੀਂ ਸਾਨੂੰ ਇਹ ਰੁੱਤਾਂ ਬਹੁਤ ਪਿਆਰੀਆਂ