ਜਜ਼ਬੇ ਦੀ ਮੀਨਾਕਾਰੀ

ਅਸੀਂ ਡੋਲਦੇ ਅਸਮਾਨ ਨੂੰ ਸੰਭਾਲਣਾ ਹਜੇ

ਇਸ ਜਜ਼ਬੇ ਨੂੰ ਸੀਨੇ ਵਿਚ ਪਾਲਣਾ ਹਜੇ

ਅਸੀਂ ਕਰਾਂਗੇ ਹਵਾਵਾਂ ਉੱਤੇ ਮੀਨਾਕਾਰੀਆਂ

ਬਾਕੀ ਬਚਦੇ ਰੁਝੇਵਿਆਂ ਨੂੰ ਟਾਲਣਾ ਹਜੇ

 

ਅਸੀਂ ਪਾਣੀਆਂ ਦੇ ਉੱਤੇ ਤੁਰ ਤੁਰ ਵੇਖਣਾ

ਫਿਰ ਪੱਥਰਾਂ ਦੇ ਵਾਂਗ ਭੁਰ-ਭੁਰ ਵੇਖਣਾ

ਅਸੀਂ ਮਿੱਟੀਆਂ ਨੂੰ ਚੁੰਮਣਾਂ ਤੇ ਮਿੱਟੀ ਹੋ ਜਾਣਾ

ਅਸੀਂ ਸਮਿਆਂ ਦੇ ਸੱਚ ਨੂੰ ਹੰਗਾਲਣਾ ਹਜੇ

 

ਅਸੀਂ ਤਾਰਿਆਂ ਦੀ ਗਿਣਤੀ ਵੀ ਕਰ ਜਾਵਣੀ

ਰਹਿੰਦੀ ਚੰਨ ਵਾਲੀ ਵਿੱਥ ਵੀ ਹੈ ਭਰ ਆਵਣੀ

ਅਸੀਂ ਸੂਰਜੇ ਦਾ ਮੱਥਾ ਚੁੰਮ ਕੇ ਵਿਖਾਵਣਾ

ਇਸ ਹੌਂਸਲੇ ਦਾ ਦੀਪ ਵੀ ਤਾਂ ਬਾਲਣਾ ਹਜੇ

 

ਅਸੀਂ ਰੁੱਖਾਂ ਨਾਲ ਪਾਉਣੀਆਂ ਬੁਝਾਰਤਾਂ ਵੀ ਨੇ

ਸਿਖ ਲੈਣੀਆਂ ਇਹ ਅਸਲ ਮੁਹਾਰਤਾਂ ਵੀ ਨੇ

ਅਸੀਂ ਫੁੱਲਾਂ ਨਾਲ ਇਸ਼ਕ ਲੜਾਉਣਾ ਵੀ ਤਾਂ ਹੈ

ਅਸੀਂ ਖ਼ਾਰਾਂ ਵਿਚੋਂ ਖ਼ੁਦ ਨੂੰ ਹੈ ਭਾਲਣਾ ਹਜੇ

 

ਅਸੀਂ ਕਰਾਂਗੇ ਹਵਾਵਾਂ ਉੱਤੇ ਮੀਨਾਕਾਰੀਆਂ

ਬਾਕੀ ਬਚਦੇ ਰੁਝੇਵਿਆਂ ਨੂੰ ਟਾਲਣਾ ਹਜੇ