ਹਾਣੀਆਂ ਦਾ ਦੇਸ

ਇਥੋਂ ਕਿਤੋਂ ਲੰਘਿਆ ਸੀ ਜੋਗੀਆਂ ਦੇ ਵੇਸ ਵਾਲਾ

ਇਥੇ ਕਿਤੇ ਬੋਲਿਆ ਸੀ ਕਾਂ

ਇਥੇ ਕਿਤੇ ਰੁੱਖੜੇ ਨੂੰ ਆਈਆਂ ਸੀ ਜਵਾਨੀਆਂ

ਇਥੇ ਕਿਤੇ ਖੇਡਦੀ ਸੀ ਛਾਂ

 

ਇਥੇ ਹੀ ਤਾਂ ਉੱਡੀਆਂ ਸੀ ਮੌਜ ਦੀਆਂ ਘੁੱਗੀਆਂ

ਸੀ ਇਥੇ ਹੀ ਤਾਂ ਰੁਕਿਆ ਸਮਾਂ

ਇਥੇ ਹੀ ਤਾਂ ਚਾਵਾਂ ਦੀ ਗੁਲੇਲ ਵਿਚੋਂ ਛੱਡੀਆਂ ਮੈਂ

ਰੋੜੀਆਂ ਦਾ ਸ੍ਵਾਬ ਕੀ ਦਵਾਂ

 

ਇਥੇ ਹੀ ਤਾਂ ਖ਼ਾਬ ਲਟਬੌਰੇ ਹੋ ਹੋ ਨੱਚਦੇ ਸੀ

ਮਹਿਕਾਂ ਦੀ ਸੀ ਬਲ਼ਦੀ ਸ਼ਮ੍ਹਾ

ਇਥੇ ਹੀ ਤਾਂ ਤੇਰਾ ਹੱਥ ਫੜ੍ਹ ਚਿੱਤ ਕਰਦਾ ਸੀ

ਮੈਂ ਤਾਂ ਬਸ ਉੱਡਦਾ ਰਵਾਂ

 

ਇਥੇ ਹੀ ਤਾਂ ਖੁਸ਼ਬੂ ਨੂੰ ਸਾਹੀਂ ਅਸੀਂ ਗੁੰਨ੍ਹਿਆ ਸੀ

ਖੂਨ ਵਿਚ ਕੀਤਾ ਸੀ ਰਵਾਂ

ਇਥੇ ਤੇਰੇ ਨੈਣਾਂ ਵਿਚ ਨਾਮ ਜਿਹੜਾ ਤਰਦਾ ਸੀ

ਚਿੱਤ ਕਰੇ ਮੁੜਕੇ ਪੜ੍ਹਾਂ