ਸਾਹੋਂ ਨੇੜੇ
ਸਾਹੋਂ ਨੇੜੇ ਹੋ ਕੇ ਬਹਿ ਜਾ
ਰੀਝ ਦਾ ਮੁੱਖੜਾ ਧੋ ਕੇ ਬਹਿ ਜਾ
ਅੱਜ ਤੂੰ ਵਕਤ ਨੂੰ ਭੁੱਲ ਕੇ ਬਹਿ ਜਾ
ਅੱਜ ਤੂੰ ਸੁਰਤ ਨੂੰ ਖੋ ਕੇ ਬਹਿ ਜਾ
ਸਾਹੋਂ ਨੇੜੇ ਹੋ ਕੇ ਬਹਿ ਜਾ
ਅੱਜ ਦਿਲੇ ਦੀਆਂ ਖੋਲ੍ਹ ਲੈ ਗੰਢਾਂ
ਅੱਜ ਤੂੰ ਚਾਨਣ ਚਾਨਣ ਕਰਦੇ
ਅੱਜ ਨ੍ਹੇਰੇ ਨੂੰ ਵੱਟ ਖਾਂ ਘੂਰੀ
ਅੱਜ ਸ਼ਰਮਾਂ ਦੇ ਚੁੱਕ ਖਾਂ ਪਰਦੇ
ਰਾਤ 'ਚ ਬਾਤ ਪਰੋ ਕੇ ਬਹਿ ਜਾ
ਸਾਹੋਂ ਨੇੜੇ ਹੋ ਕੇ ਬਹਿ ਜਾ
ਅੱਜ ਦੇਹਾਂ ਦੇ ਵਰਕੇ ਪੜ੍ਹੀਏ
ਅੱਜ ਰੂਹਾਂ ਦੀ ਪੌੜੀ ਚੜ੍ਹੀਏ
ਅੱਜ ਇੱਕ ਨਸ਼ਾ ਅਵੱਲਾ ਕਰੀਏ
ਇਕ ਦੂਜੇ ਦੇ ਨੈਣੀਂ ਤਰੀਏ
ਅਕਲਾਂ ਦੇ ਦਰ ਢੋਅ ਕੇ ਬਹਿ ਜਾ
ਸਾਹੋਂ ਨੇੜੇ ਹੋ ਕੇ ਬਹਿ ਜਾ
