ਪਟਿਆਲਾ

ਮੇਰੇ ਹੀ ਉਹ ਹਿੱਸੇ ਤੇ ਕਹਾਣੀਆਂ ਦਾ ਦੇਸ ਹੈ

ਚੇਤਿਆਂ 'ਚ ਵੱਸੇ ਜਿਹੜਾ ਹਾਣੀਆਂ ਦਾ ਦੇਸ ਹੈ

ਹੋਈਆਂ ਗੱਲਾਂ ਬੀਤੀਆਂ ਪੁਰਾਣੀਆਂ ਦਾ ਦੇਸ ਹੈ

ਹਾਣੀਆਂ ਦਾ ਦੇਸ ਪਰ ਹਾਣੀਆਂ ਦਾ ਦੇਸ ਹੈ ।

 

ਜਿੱਥੇ ਰਹਿ ਕੇ ਧੁੱਪਾਂ ਨੂੰ ਸ਼ਿੰਗਾਰ ਅਸੀਂ ਕੀਤੇ ਸੀ

ਨੰਨੜੇ ਜਿਹੇ ਸੁਪਨੇ ਉਡਾਰ ਅਸੀਂ ਕੀਤੇ ਸੀ

ਅਕਲਾਂ ਦੇ ਵਹਿਣ ਜਿੱਥੇ ਪਾਰ ਅਸੀਂ ਕੀਤੇ

ਇਹੀ ਤਾਂ ਉਹ ਉਮਰਾਂ ਨਿਆਣੀਆਂ ਦਾ ਦੇਸ ਹੈ

 

ਜਿੱਥੇ ਅਸੀਂ ਸਿੱਖਿਆ ਸੀ ਆਪਾ ਕਿਵੇਂ ਵਾਰਨਾ

ਮਹਿਕ ਕਿਵੇਂ ਮਾਨਣੀ ਤੇ ਨਜ਼ਰਾਂ ਉਤਾਰਨਾ

ਗੀਤ ਗਾਉਣੇ ਤੇਰੇ ਨਾਲੇ ਜ਼ੁਲਫਾਂ ਸੰਵਾਰਨਾ

ਕੱਚੀ ਤੰਦ ਇਸ਼ਕੇ ਦੀ ਤਣੀਆਂ ਦਾ ਦੇਸ ਹੈ

 

ਜਿੱਥੇ ਸਾਡੀ ਦੋਸਤੀ ਹਵਾਵਾਂ ਨਾਲ ਪਈ ਸੀ

ਆਪਣੇ ਹਿੱਸੇ ਦੀ ਅਸਾਂ ਮਹਿਕ ਲੱਭ ਲਈ ਸੀ

ਜਿੱਥੇ 'ਉਹਨੇਂ' ਸਭ ਤੋਂ ਪਿਆਰੀ ਗੱਲ ਕਹੀ ਸੀ

ਉਹੀ ਰਾਹਾਂ ਜਾਣੀਆਂ ਪਛਾਣੀਆਂ ਦਾ ਦੇਸ ਹੈ