ਸੂਟਾਂ ਦੇ ਰੰਗ

ਹੁਣ

ਮੈਨੂੰ ਤੇਰੇ ਸੂਟਾਂ ਦੇ ਰੰਗ ਯਾਦ ਨਹੀਂ ਰਹਿੰਦੇ

ਅੱਜਕਲ, ਮੈਂ ਕਾਲੇ ਤੇ ਸਫੈਦ

ਵਿਚਲਾ ਸਫ਼ਰ ਕਰ ਰਿਹਾਂ !

 

ਉਹ ਵਕਤ ਗੁਜ਼ਰ ਗਿਆ

ਤੇ ਓਸੇ ਵਕਤ ਵਿਚ ਉਹ ਰੰਗ ਗਵਾਚ ਗਏ

ਜਿਹੜੇ

ਤੇਰੇ ਨੈਣਾਂ 'ਚੋਂ ਉੱਠ

ਮੇਰੇ ਖ਼ਾਬਾਂ ਨੂੰ ਰੰਗਣ ਆਉਂਦੇ ਸੀ

ਤੇ ਮੈਂ ਅਗਲੀ ਸਵੇਰ ਤੈਨੂੰ ਆਖਦਾ;

ਮੈਨੂੰ ਪਤਾ ਸੀ, ਤੂੰ ਅੱਜ ਇਸੇ ਰੰਗ ਦਾ ਸੂਟ ਪਾਉਣੈ

ਪਰ ਬਦਲ ਗਿਆ ਏ ਹੁਣ ‘ਬੜਾ ਕੁਝ'

ਬੜਾ ਕੁਝ ?

ਜੋ ਤੇਰੇ ਮੇਰੇ ਚਿੱਤ ਚੇਤੇ ਵੀ ਨਹੀਂ ਸੀ

ਵਕਤ ਅੱਜਕਲ੍ਹ

ਮੇਰੀ ਪਿੱਠ 'ਤੇ ਲੱਦੇ ‘ਬੈਗ਼’

ਤੇ ਮੇਰੀਆਂ 'ਜੇਬਾਂ' ਦੀ ਸ਼ਨਾਖਤ ਕਰਦੈ