ਤਲਿਸਮ

ਧਰਤੀ ਪਤਾ ਨਹੀਂ

ਕਿਹੜੇ ਚਾਅ 'ਚ ਘੁੰਮੀਂ ਹੀ ਜਾ ਰਹੀ

ਸੂਰਜ ਪਤਾ ਨਹੀਂ ਕਿਸ ਦੇ ਵਿਯੋਗ 'ਚ ਤਪਦਾ ਹੀ ਰਹਿੰਦਾ

 

ਆਸਮਾਨ ਦੇ ਵਿਹੜੇ

ਤਾਰਿਆਂ ਨੂੰ ਖੇਡਣੋਂ ਕੋਈ ਨਹੀਂ ਰੋਕਦਾ

ਚੰਨ, ਸਮੁੰਦਰੀ ਪਾਣੀਆਂ ਨਾਲ ਅਠਖੇਲੀਆਂ ਕਰਦਾ

ਅੱਧਾ, ਪੌਣਾ, ਚੱਪਾ

ਸਬੂਤਾ ਹੁੰਦਾ ਰਹਿੰਦਾ

 

ਪਹਾੜਾਂ ਕੋਲੋਂ ਭੇਦ

ਸੰਭਾਲੇ ਨਹੀਂ ਜਾਂਦੇਂ ਜਦੋਂ

ਤਾਂ ਜਵਾਲਾਮੁੱਖੀ ਬਣ ਕੇ ਫੁੱਟ ਪੈਂਦੇ ਨੇ

ਤੇ ਬੰਦਾ ਬਸ

ਜਿੱਤਾਂ ਦੇ ਮੱਥੇ ਚੁੰਮਣ ਲਈ ਹੀ ਪੈਦਾ ਨਹੀਂ ਹੋਇਆ

ਜੇ ਉਸ ਨੂੰ ਹਾਰ ਜਾਣ ਦੀ ਬਰਕਤ ਦਾ ਨਹੀਂ ਪਤਾ !