ਵਰ ਪ੍ਰਾਪਤੀ ਉਮਰੇ

ਵਰ ਪ੍ਰਾਪਤ ਦੀ ਉਮਰੇ ਹਾਂ ਵਰੰ ਨੂੰ ਭਾਲਦੀ ਆਈਆਂ

ਤੁਸੀਂ ਸੁੰਦਰ ਸੁਣੀਂਦੇ ਹੋ ਤੁਸੀਂ ਸੁਹਜਾਂ ਦੇ ਹੋ ਸਾਂਈਆਂ।

 

ਗੁਮਾਨੀ ਹੋਵਦੇ ਸੁੰਦਰ ਓ ਬੇ-ਪਰਵਾਹ ਸੁਣੀਂਦੇ ਹਨ,

ਤੁਸੀਂ ਤਾਂ ਸੁੰਦਰਤਾ ਸਾਗਰ ਤੁਸਾਂ ਕੋਈ ਨ ਪਰਵਾਹੀਆਂ।

 

ਹੇ ਬੇਪਰਵਾਹ ਸੁੰਦਰ ਜੀ! ਦੁਆਰੇ ਆਣ ਖਲੀਆਂ ਹਾਂ

ਲਓ ਲੜ ਲਾ ਅਸਾਨੂੰ ਜੀ! ਕਿ ਦੂਰੋਂ ਖਿੱਚ ਖਾ ਆਈਆਂ।

 

ਹੈ ਖਿਚ ਨੇ ਖਿੱਚਿਆ ਐਸਾ ਮਿਲੇ ਬਿਨ ਰਹਿ ਸਕੇਂਦੀ ਨਾ

'ਪਿਛੇ-ਪੁਰਾਤਨ-ਸੁਰਤ' ਸਾਡੀ ਰਹੀ ਰੱਤੀ ਨ ਹੋ ਸਾਂਈਆਂ!

 

ਸਮਾਈਆਂ ਕਰ ਲਓ ਸੁੰਦਰ! ਕਿ ਦੂਰੋਂ ਕਰਦੀਆਂ ਧਾਈਆਂ

ਸ਼ਰਣ ਹੁਣ ਆਣ ਪਈਆਂ ਹਾਂ ਕਿ ਸ਼ਰਨੀ ਆਪਦੀ ਸਾਈਆਂ!

(ਕਸੌਲੀ 7-9-50)