ਜਾਤੀ ਬਿਆਨ

ਮੈਂ ਕਿਸੇ ਦਾ ਸੁੱਕਾ ਨਈਂ

ਮੈਨੂੰ ਸਾਰੇ ਇੱਕੋ ਜਏ ਨੇ

ਸਾਰੀ ਦੁਨੀਆਂ ਮੇਰੀ ਏ

ਮੈਂ ਕਿਸੇ ਦਾ ਸੁੱਕਾ ਨਈਂ

ਰਾਹ

ਵੇਖੀ ਦਾ ਏ

ਪੁੱਛੀ ਦਾ ਏ

ਦੱਸੀ ਦਾ ਏ

ਮੋੜੀ ਦਾ ਏ

ਬਦਲੀ ਦਾ ਏ

ਡੱਕੀ ਦਾ ਨਈਂ ।

ਅੱਥਰੂ

ਨਾ ਪੀਏ ਤੇ, ਲੜ ਪੈਨੇ ਆਂ।

ਪੀ ਲਈਏ ਤੇ, ਲੜ ਜਾਂਦੇ ਨੇ।

ਗੀਤ

ਸਭ ਦਾ ਰੱਬ ਏ ਰੱਬ ਦਾ ਸਭ ਏ,

ਕਿੱਥੋਂ ਆਇਆ ਗ਼ੈਰ

ਇੱਕੋ ਕੁਦਰਤ ਦੇ ਸਭ ਬੰਦੇ,

ਕਾਹਨੂੰ ਰੱਖੀਏ ਵੈਰ।

ਸਭ ਦਾ ਭਲਾ ਤੇ ਸਭ ਦੀ ਖ਼ੈਰ,

ਕੁਲ ਦਾ ਭਲਾ ਤੇ ਕੁੱਲ ਦੀ ਖ਼ੈਰ।

 

ਹਿੰਦੂ ਮੁਸਲਿਮ ਸਿੱਖ ਇਸਾਈ,

ਕਿਧਰੇ ਬੁੱਧੇ -ਬੱਧੇ।

ਧਰਮਾਂ ਦੇ ਵਿੱਚ ਫਸਕੇ ਜੀਵਣ,

ਰਹਿ ਗਏ ਅੱਧ ਪਚੱਧੇ।

ਮਨ ਤੋਤੇ ਦਾ ਖੋਲ ਕੇ ਪਿੰਜਰਾ,

ਬਾਗੀਂ ਕਰੀਏ ਸੈਰ,

ਸਭ ਦਾ ਭਲਾ ਤੇ ਸਭ ਦੀ ਖ਼ੈਰ,

ਕੁੱਲ ਦਾ ਭਲਾ ਤੇ ਕੁੱਲ ਦੀ ਖ਼ੈਰ।