ਚੰਗਾ ਹੋਇਆ

ਪੰਗਾ ਹੋਇਆ ਏ

ਦੰਗਾ ਹੋਇਆ ਏ

ਕਿਹੜਾ ਕੀ ਏ  

ਨੰਗਾ ਹੋਇਆ ਏ

ਚੰਗਾ ਹੋਇਆ ਏ

ਭੁਰਦਾ ਰਹਿਨਾ....

ਭਾਵੇਂ ਭੁਰਦਾ ਰਹਿੰਦਾ ਵਾਂ

ਫੇਰ ਵੀ ਤੁਰਦਾ ਰਹਿੰਦਾ ਵਾਂ

ਅੱਥਰੂ ਚੱਖ ਕੇ ਦੇਖੇ ਨੇ

ਲੂਣ ਹਾਂ ਖੁਰਦਾ ਰਹਿੰਦਾ ਵਾਂ

ਰੱਬ ਤੇ ਬੰਦਾ

ਬੰਦਾ ਰੱਬ ਬਣਾਉਂਦਾ ਆਇਆ

ਬੰਦਾ ਰੱਬ ਬਣਾਉਂਦਾ ਰਹਿੰਦਾ

ਬੰਦਾ ਰੱਬ ਬਣਾ ਰਿਹਾ ਹੈ

ਬੰਦਾ ਰੱਬ ਬਣਾਵੇ, ਨਾ ਤੇ

ਰੱਬ ਵੀ ਬੰਦਾ ਬਣ ਜਾਵੇ

ਅੱਲ੍ਹਾ ਦੇ ਘਰ ਘੱਲੋ ਦਾਣੇ

ਚੜ੍ਹੀ ਵਿਸਾਖੀ ਵਾਢੇ ਬੈਠੇ,

ਪੱਕੀ ਕਣਕ ਵਢੀਚਣ ਲੱਗੀ।

ਤਿੱਖੀ ਧੁੱਪੇ ਭਰੀਆਂ ਬੱਝੀਆਂ,

ਅੱਧੀ ਰਾਤ ਗਵੀਚਣ ਲੱਗੀ।

ਕਹਿਣ ਖ਼ੁਦਾ ਦਾ ਹਿੱਸਾ ਘੱਲੋ,

ਵਿਚ ਮਸੀਤਾਂ ਦੇ ਮਲਵਾਣੇ।

ਅੱਲ੍ਹਾ ਦੇ ਘਰ ਘੱਲੋ ਦਾਣੇ,

ਭਾਵੇਂ ਅੱਲ੍ਹਾ ਨੇ ਨਈਂ ਖਾਣੇ।

ਅੱਲ੍ਹਾ ਦੇ ਘਰ ਘੱਲੋ ਦਾਣੇ

ਦਾਣੇ ਯਾਂ ਫਿਰ ਪੈਸੇ ਘੱਲੋ

ਜੋ ਵੀ ਜੀ ਕਰਦਾ ਏ ਘੱਲੋ !

ਰੱਬ ਦੇ ਘਰ ਵਿਚ ਹਿੱਸਾ ਪਾਓ,

ਜੋ ਵੀ ਪੁੱਜਦਾ ਸਰਦਾ ਏ ਘੱਲੋ।

ਰੱਬ ਦੇ ਘਰ ਦੇ ਹਮਸਾਏ

ਅੱਲ੍ਹਾ ਦੇ ਘਰ ਘੱਲੋ ਦਾਣੇ,

ਭਾਵੇਂ ਅੱਲ੍ਹਾ ਨੇ ਨਈਂ ਖਾਣੇ।