ਬਾਬਾ ਬੰਦਾ ਸਿੰਘ ਨਾਦੇੜ ਤੋਂ ਪੰਜਾਬ ਵੱਲ ਚੱਲੇ ਤਾਂ ਮਾਲਵੇ ਦੀ ਸੰਗਤ ਦੇ ਨਾਮ ਹੁਕਮਨਾਮੇ ਭੇਜਦੇ ਰਹੇ ਕਿ ਸਾਡੀ ਸੈਨਾ ਵਿਚ ਭਰਤੀ ਹੋਵੇ। ਭਾਈ ਫਤਿਹ ਸਿੰਘ ਨੇ ਦਸ ਹੋਰ ਯੋਧੇ ਅਪਣੇ ਨਾਲ ਲੈਕੇ ਕੇਬਲ ਕਸਬੇ ਵਿਚ ਬਾਬਾ ਬੰਦਾ ਸਿੰਘ ਨੂੰ ਫਤਿਹ ਬੁਲਾਈ। ਇਹ ਗਿਆਰਾਂ ਜਣੇ ਖਾਲਸਾ ਸੈਨਾ ਦਾ ਹਿੱਸਾ ਬਣੇ ਜਿਨ੍ਹਾਂ ਨੇ ਪਹਿਲੋਂ ਕੇਬਲ ਲੁੱਟਿਆ ਫਿਰ ਸਮਾਣਾ ਸ਼ਹਿਰ ਫਤਿਹ ਕੀਤਾ। ਬਾਬਾ ਬੰਦਾ ਸਿੰਘ ਨੇ ਭਾਈ ਫਤਿਹ ਸਿੰਘ ਦੇ ਜੰਗੀ ਕਰਤੱਬ ਦੰਗ ਕਰ ਦੇਣ ਵਾਲੇ ਦੇਖੇ। ਸਮਾਣੇ ਦਾ ਹਾਕਮ ਭਾਈ ਫਤਿਹ ਸਿੰਘ ਜੀ ਨੂੰ ਥਾਪਿਆ।

ਸੱਜੇ ਖੱਬੇ ਝੜਪਾਂ ਹੁੰਦੀਆਂ ਰਹੀਆਂ, ਆਖਰ ਬਨੂੜ ਟਿਕਾਣਾ ਕੀਤਾ ਜਿਥੇ ਪਤਾ ਲੱਗ ਗਿਆ ਕਿ ਮਾਲਵੇ ਦੇ ਕਾਫਲੇ ਵਿਚ ਸ਼ਾਮਲ ਹੋਣ ਵਾਸਤੇ ਮਝੇਲਾਂ ਦਾ ਜਥਾ ਆ ਰਿਹਾ ਹੈ। ਮਲੇਰਕੋਟਲੇ ਦੇ ਨਵਾਬ ਮੁਹੰਮਦ ਸ਼ੇਰ ਖਾਨ ਨੇ ਮਝੋਲਾ ਨੂੰ ਰੋਕਿਆ ਤਾਂ ਖੂਨੀ ਜੰਗ ਹੋਈ ਜਿਸ ਵਿਚ ਨਵਾਬ ਦਾ ਭਰਾ ਅਤੇ ਭਤੀਜੇ ਮਾਰੇ ਗਏ ਤੇ ਉਹ ਪਿਛੇ ਹਟ ਗਿਆ। ਇਹ ਜੰਗੀ ਜਥਾ ਬਨੂੜ ਪੁੱਜਾ ਤਾਂ ਜੈਕਾਰਿਆਂ ਨਾਲ ਅਸਮਾਨ ਗੂੰਜਿਆ।

ਚਪੜਚਿੜੀ ਦੇ ਸਥਾਨ ਤੇ ਜਦੋਂ ਵਜ਼ੀਰ ਖਾਨ ਅਤੇ ਬਾਬਾ ਬੰਦਾ ਸਿੰਘ ਦਾ ਆਹਮ ਸਾਹਮਣੇ ਯੁੱਧ ਛਿੜਿਆ ਤਾਂ ਗਹਿਗੱਚ ਮੁਕਾਬਲੇ ਵਿਚ, ਸ਼ੇਰ ਫਤਿਹ ਸਿੰਘ ਨੇ ਰਕਾਬਾਂ ਤੇ ਖਲੋ ਕੇ ਦੋਵਾਂ ਹੱਥਾਂ ਨਾਲ ਕਿਰਪਾਨ ਦਾ ਉਹ ਜਬਰਦਸਤ ਵਾਰ ਕੀਤਾ ਕਿ ਵਜ਼ੀਰ ਖਾਨ ਦੇ ਸੱਜੇ ਮੋਢੇ ਵਿਚ ਦੀ ਬੈਠਦੀ ਹੋਈ ਕਿਰਪਾਨ ਖੱਬੀ ਵੱਖੀ ਵਿਚੋਂ ਨਿਕਲ ਗਈ। ਖਾਨ ਦੇ ਧੜ ਦੇ ਦੋਵੇਂ ਟੋਟੇ ਘੜੇ ਦੇ ਸੱਜੇ ਖੱਬੇ ਡਿਗ ਪਏ। ਇਹ ਮਹਾਨ ਕਾਰਨਾਵਾਂ 12 ਮਈ 1710 ਈਸਵੀ ਨੂੰ ਵਾਪਰਿਆ। ਮਲੇਰੀਆ ਨਵਾਬ ਸ਼ੇਰ ਖਾਨ ਵੀ ਬਹਾਦਰੀ ਨਾਲ ਲੜਦਾ ਹੋਇਆ ਇਥੇ ਢੇਰੀ ਹੋ ਗਿਆ। ਬਾਜ ਸਿੰਘ ਨੂੰ ਸਰਹੰਦ ਦਾ ਹਾਕਮ ਥਾਪਿਆ। ਭਾਈ ਫ਼ਤਿਹ ਸਿੰਘ ਨੂੰ ਪੰਥ ਨੇ ਮਾਲਵੇ ਦਾ ਸ਼ੇਰ ਖਿਤਾਬ ਬਖਸ਼ਿਆ।

ਭਾਈ ਫਤਿਹ ਸਿੰਘ ਦੇ ਪੰਜ ਪੁੱਤਰ ਹੋਏ- ਦਾਨ ਸਿੰਘ, ਸਿੱਧ ਸਿੰਘ, ਸੰਗੂ ਸਿੰਘ, ਕੌਰ ਸਿੰਘ ਤੇ ਹਿੰਮਤ ਸਿੰਘ। ਬੀਬੀ ਸੁਰਿੰਦਰ ਕੌਰ ਬਾਦਲ, ਭਾਈ ਹਿੰਮਤ ਸਿੰਘ ਦੇ ਖਾਨਦਾਨ ਵਿਚੋਂ ਹਨ। ਪਟਿਆਲੇ ਦੇ ਮਹਾਰਾਜਾ ਸਾਹਿਬ ਸਿੰਘ ਨੇ ਨਾਨਕਸ਼ਾਹੀ ਇੱਟਾ ਨਾਲ ਸ਼ਾਨਦਾਰ ਗੁਰਦੁਆਰਾ ਪਾਉਂਟਾ ਸਾਹਿਬ ਇਸ ਚੱਕ ਫਤਹਿ ਸਿੰਘ ਪਿੰਡ ਵਿਚ ਉਸਾਰਿਆ।

ਬੂਟਾ ਸਿੰਘ ਜੀ ਨੇ ਆਖ਼ਰ ਦੱਸਿਆ- ਇਸ ਇਤਿਹਾਸਕ ਗੁਰਦੁਆਰੇ ਦੀ ਕਾਰ ਸੇਵਾ ਵਾਸਤੇ ਦਿੱਲੀ ਤੋਂ ਬਾਬਾ ਹਰਬੰਸ ਸਿੰਘ ਆ ਗਏ। ਅਸੀਂ ਬੜੇ ਹੱਥ ਬੰਨ੍ਹੇ ਕਿ ਇਸ ਗੁਰਦੁਆਰੇ ਨੂੰ ਨਾ ਢਾਹੇ, ਉਹ ਨਹੀਂ ਮੰਨੇ। ਖੂਬਸੂਰਤ ਚੂਨੇਗਚ ਇਮਾਰਤ ਢੇਰੀ ਕਰ ਦਿਤੀ। ਉਹ ਬੇਰੀ ਮੌਜੂਦ ਸੀ ਜਿਸ ਨਾਲ ਗੁਰੂ ਜੀ ਨੇ ਘੋੜਾ ਬੰਨ੍ਹਿਆ ਸੀ। ਉਸਨੂੰ ਪੁੱਟਣ ਲਗੇ ਤਾਂ ਅਸੀਂ ਜੁਆਨਾ ਨੇ ਬੇਰੀ ਨੂੰ ਜੱਫੀਆਂ ਪਾ ਲਈਆਂ। ਕਿਹਾ- ਪਹਿਲਾਂ ਸਾਨੂੰ ਵੱਢੇ। ਇਕ ਤਾਂ ਜੀ ਪਿੰਡ ਅਨਪੜ੍ਹਾਂ ਦਾ, ਦੂਜੇ ਅਸੀਂ ਦਾਹੜੀਆਂ ਕੁਤਰੀਆਂ ਵਾਲੇ ਕਾਮਰੇਡ । ਕਾਰ ਸੇਵਾ ਵਾਲਿਆਂ ਨੂੰ ਪੇਂਡੂਆਂ ਨੇ ਕਿਹਾ- ਇਹ ਕਾਮਰੇਡ ਹਰ ਚੰਗੇ ਕੰਮ ਵਿੱਚ ਵਿਘਨ ਪਾਉਂਦੇ ਹਨ, ਇਨ੍ਹਾਂ ਨੂੰ ਹਟਾਉ ਏਥੋਂ। ਪੇਂਡੂਆਂ ਅਤੇ ਕਾਰ ਸੇਵਾ ਵਾਲਿਆਂ