ਇਸ਼ਕ-ਇਸ਼ਕ ਨੂੰ

ਇਸ਼ਕ-ਇਸ਼ਕ ਨੂੰ ਕੋਲ ਬਿਠਾ ਕੇ

ਗੱਲ ਇਸ਼ਕ ਦੀ ਦੱਸਣ ਲੱਗਾ

ਇਸ਼ਕ ਨੂੰ ਇਸ਼ਕ ਦੀ ਤੜਫ ਵੇਖ

ਇਸ਼ਕ ਹੀ ਇਸ਼ਕ ਤੇ ਹੱਸਣ ਲੱਗਾ

ਵੇਖ ਬੁੱਲੀ ਉਹਦੇ ਜ਼ਿਕਰ ਇਸ਼ਕ ਦਾ

ਇਸ਼ਕ-ਇਸ਼ਕ ਤੇ ਮੱਚਣ ਲੱਗਾ

ਵੇਖ ਇਸ਼ਕ ਨੂੰ ਠੋਕਰ ਪੈਂਦੀ ਇਸ਼ਕ ਵਿੱਚ

ਇਸ਼ਕ ਹੀ ਖੁਸ਼ੀ ਵਿੱਚ ਨੱਚਣ ਲੱਗਾ

ਕੌਣ ਕਹਿੰਦਾ ਚੰਮਾਂ ਇਸ਼ਕ ਹੀ ਸਭ ਕੁਝ

ਇੱਥੇ ਇਸ਼ਕ ਹੀ ਇਸ਼ਕ ਨੂੰ ਡੱਸਣ ਲੱਗਾ

 

 

 

ਇਸ਼ਕ ਮੈਖ਼ਾਨਾ

 

ਚੰਮ

ਵਿਸ਼ੇਸ਼ ਧੰਨਵਾਦ

 

ਮੈਂ ਆਪਣੇ ਪਰਮ ਮਿੱਤਰ ਰਾਜਵਿੰਦਰ ਸਿੰਘ ਮਾਨ ਦਾ ਦਿਲ ਦੀਆਂ ਗਹਿਰਾਈਆਂ ਤੋਂ ਧੰਨਵਾਦ ਕਰਦਾ ਹਾਂ। ਜਿਸਨੇ ਹਰ ਖੁਸ਼ੀ ਗ਼ਮੀ ਮੌਕੇ ਮੇਰੇ ਮੋਢੇ ਨਾਲ ਮੋਢਾ ਜੋੜ ਕੇ ਮੇਰਾ ਸਾਥ ਦਿੱਤਾ। ਜੇ ਰਾਜਵਿੰਦਰ ਨਾ ਹੁੰਦਾ ਤਾਂ ਸ਼ਾਇਦ ਮੇਰਾ ਕਿਤਾਬ ਲਿਖਣ ਦਾ ਸੁਪਨਾ ਮਹਿਜ ਸੁਪਨਾ ਹੀ ਬਣ ਕੇ ਰਹਿ ਜਾਂਦਾ। ਇਸ ਸਖਸ਼ ਨੇ ਨਾ ਸਿਰਫ਼ ਕਿਤਾਬ ਲਿਖਣ ਲਈ ਮੈਨੂੰ ਪ੍ਰੇਰਿਤ ਕੀਤਾ ਸਗੋਂ ਕਿਤਾਬ ਦੀ ਟਾਈਪਿੰਗ ਤੋਂ ਲੈ ਕੇ ਡਿਜ਼ਾਇਨਿੰਗ ਤੱਕ ਦਾ ਸਾਰਾ ਬੋਝ ਆਪਣੇ ਮੋਢਿਆਂ ਉੱਪਰ ਲੈ ਲਿਆ। ਸ਼ਾਇਦ ਇਸਦੀ ਦੋਸਤੀ ਦਾ ਕਰਜ਼ ਉਤਾਰਣ ਲਈ ਸ਼ਾਇਦ ਮੇਰੀ ਇਕ ਜਿੰਦਗੀ ਘੱਟ ਹੈ ਪਰ ਮੇਰੇ ਪਿਆਰੇ ਮਿੱਤਰ ਮੈਂ ਪੂਰੀ ਕੋਸ਼ਿਸ਼ ਕਰਾਂਗਾ ਤੇਰੀਆਂ ਉਮੀਦਾਂ ਤੇ ਖਰਾ ਉਤਰਨ ਦੀ।

-ਤੇਰਾ ਪਿਆਰਾ ਮਿੱਤਰ

ਚੰਮ

 

 

ਸਮਰਪਣ

ਦਾਦਾ ਤੇਜ ਰਾਮ ਖੱਤਰੀ ਤੇ ਦਾਦੀ ਮਥੁਰਾ ਦੇਵੀ ਨੂੰ ਸਮਰਪਿਤ

ਜਿਹਨਾਂ ਨੇ ਸਾਨੂੰ ਰਾਜਿਆਂ ਵਰਗੀ ਜ਼ਿੰਦਗੀ ਦਿੱਤੀ ।

 

ਸਵਾਲ - ਜਵਾਬ

ਰੱਬ- ਪਿਆਰ ਕੀ ਹੈ?

ਮੈਂ-

ਪਿ- ਪਹਿਲੀ ਮੁਲਾਕਾਤ ਤੋਂ

ਆ- ਆਖ਼ਰੀ ਸਾਹ ਤੱਕ ਦੀ

ਰ- ਰੌਣਕ

 

ਰੱਬ- ਇਸ਼ਕ ਕੀ ਹੈ?

ਮੈਂ-

ਇ-ਇੱਕ

ਸ਼- ਸਖਸ਼ ਦਾ

ਕ- ਕਾਲਾ ਜਾਦੂ

 

ਰੱਬ- ਮੁਹੱਬਤ ਕੀ ਹੈ?

ਮੈਂ-

ਮੁ- ਮੁਸਕਰਾਉਂਦੇ ਹੋਏ ਸੱਜਣ ਦੀ

ਹੱ- ਹੱਥ ਨਾਲ ਦਿਲ ਵਿਚ

ਬ- ਬਣਾਈ ਹੋਈ ਸਦਾਬਹਾਰ

ਤ- ਤਸਵੀਰ