25. ਚੂਹੜੀ ਹਾਂ ਦਰਬਾਰ ਦੀ

ਚੂਹੜੀ ਹਾਂ ਦਰਬਾਰ ਦੀ ।ਰਹਾਉ।

 

ਧਿਆਨ ਦੀ ਛੱਜਲੀ ਗਿਆਨ ਦਾ ਝਾੜੂ,

ਕਾਮ ਕਰੋਧ ਨਿੱਤ ਝਾੜਦੀ ।

ਕਾਜ਼ੀ ਜਾਣੇ ਸਾਨੂੰ ਹਾਕਮ,

ਜਾਣੇ, ਸਾਥੇ ਫਾਰਖਤੀ ਵੇਗਾਰ ਦੀ ।1।

 

ਮੱਲ ਜਾਣੇ ਅਰ ਮਹਿਤਾ ਜਾਣੈ,

ਮੈਂ ਟਹਲ ਕਰਾਂ ਸਰਕਾਰ ਦੀ ।

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਤਲਬ ਤੇਰੇ ਦੀਦਾਰ ਦੀ ।2।

 

26. ਡਾਢਾ ਬੇਪਰਵਾਹ

ਡਾਢਾ ਬੇਪਰਵਾਹ,

ਮੈੱਡੀ ਲਾਜ ਤੈਂ ਪਰ ਆਹੀ ।

 

ਹੱਥੀ ਮਹਿੰਦੀ ਪੈਰੀਂ ਮਹਿੰਦੀ,

ਖਾਰੇ ਚਾਇ ਬਹਾਈ ।

ਸੱਸ ਨਿਨਾਣਾਂ ਦੇਂਦੀਆਂ ਤਾਹਨੇ,

ਦਾਜ ਵਿਹੂਣੀ ਆਈ ।

 

ਸੁੰਨੇ ਮੁੰਨੇ ਦਾਇਮ ਰੁੰਨੇ,

ਚਰਖੈ ਜੀਉ ਖਪਾਇਆ ।

ਬੀਬੀ ਪੱਛੀ ਦਾਇਮ ਪੱਛੀ,

ਕਤਿ ਤੁੰਬ ਜਿਸ ਵਿਚ ਪਾਇਆ ।