46. ਹੁਸੈਨੂੰ ਕਿਸ ਬਾਗ਼ੇ ਦੀ ਮੂਲੀ

ਹੁਸੈਨੂੰ ਕਿਸ ਬਾਗ਼ੇ ਦੀ ਮੂਲੀ ।

 

ਬਾਗਾਂ ਦੇ ਵਿਚਿ ਚੰਬਾ ਮਰੂਆ,

ਮੈਂ ਭਿ ਵਿਚਿ ਗੰਧੂਲੀ ।

 

ਕੂੜੀ ਦੁਨੀਆਂ ਕੂੜਾ ਮਾਣਾ,

ਦੁਨੀਆਂ ਫਿਰਦੀ ਫੁਲੀ ।

 

ਛੋਡ ਤਕੱਬਰ ਪਕੜ ਹਲੀਮੀ,

ਸ਼ਾਹ ਹੁਸੈਨ ਪਾਇ ਸਮਝੂਲੀ ।

 

47. ਇਕੁ ਅਰਜ਼ ਨਿਮਾਣਿਆਂ ਦੀ

ਇਕੁ ਅਰਜ਼ ਨਿਮਾਣਿਆਂ ਦੀ,

ਸੁਣਿ ਜਿੰਦੂ ਨੀਂ ।

 

ਸੁਰਤਿ ਦਾ ਤਾਣਾ,

ਨਿਰਤਿ ਦਾ ਬਾਣਾ,

ਹਰਿ ਹਰਿ ਪੇਟਾ

ਵੁਣਿ ਜਿੰਦੂ ਨੀਂ ।ਰਹਾਉ।

 

ਕਾਹੇ ਕੋ ਝੁਰੈਂ ਤੇ ਝਖਿ ਮਾਰੈਂ,

ਰਾਮ ਭਜਨੁ ਬਿਨੁ ਬਾਜੀ ਹਾਰੈਂ,

ਬੀਜਿਆ ਹੀ ਸੋ ਲੁਣਿ ਜਿੰਦੂ ਨੀਂ ।1।

 

ਕਾਹੇ ਗਰਬਹਿੰ ਦੇਖ ਜੁਆਨੀ,

ਤੈਂ ਜੇਹੀਆਂ ਕਈਆਂ ਖਾਨ ਖਵਾਨੀ,

ਕਾਲਿ ਲਈਆਂ ਸਭੁ ਚੁਣਿ ਜਿੰਦੂ ਨੀਂ ।2।