49. ਇਕ ਦਿਨ ਤੈਨੂੰ ਸੁਪਨਾ ਥੀਸਨਿ

ਇਕ ਦਿਨ ਤੈਨੂੰ ਸੁਪਨਾ ਥੀਸਨਿ,

ਗਲੀਆਂ ਬਾਬਲ ਵਾਲੀਆਂ ਵੋ ।ਰਹਾਉ।

 

ਉਡਿ ਗਏ ਭਉਰ ਫੁੱਲਾਂ ਦੇ ਕੋਲੋਂ,

ਸਣ ਪੱਤਰਾਂ ਸਣ ਡਾਲੀਆਂ ।1।

 

ਜਿਤੁ ਤਨਿ ਲੱਗੀ ਸੋਈ ਤਨਿ ਜਾਣੇ,

ਹੋਰ ਗੱਲਾਂ ਕਰਨ ਸੁਖਾਲੀਆਂ ।2।

 

ਰਹੁ ਵੇ ਕਾਜੀ ਦਿਲ ਨਹੀਓਂ ਰਾਜੀ,

ਗੱਲਾਂ ਹੋਈਆਂ ਤਾਂ ਹੋਵਣ ਵਾਲੀਆਂ ।3।

 

ਸੇਈ ਰਾਤੀਂ ਲੇਖੇ ਪਉਸਨਿ,

ਜੋ ਨਾਲ ਸਾਹਿਬ ਦੇ ਜਾਲੀਆਂ ।4।

 

ਨਾਉਂ ਹੁਸੈਨਾ ਤੇ ਜਾਤ ਜੁਲਾਹਾ,

ਗਾਲੀਆਂ ਦੇਂਦੀਆਂ ਤਾਣੀਆਂ ਵਾਲੀਆਂ ।5।

 

50. ਇਕਿ ਦੁਇ ਤਿਨ ਚਾਰਿ ਪੰਜ

ਇਕਿ ਦੁਇ ਤਿਨ ਚਾਰਿ ਪੰਜ,

ਛਿਇ ਸਤਿ ਅਸੀਂ ਅਠਿ ਨਉਂ ।ਰਹਾਉ।

 

ਚਰਖਾ ਚਾਇ ਸਭੇ ਘਰ ਗਈਆਂ,

ਰਹੀ ਇਕੇਲੀ ਇਕਿ ਹਉਂ ।1।

 

ਜੇਹਾ ਰੇਜਾ ਠੋਕਿ ਵੁਣਾਇਓ,

ਤੇਹੀ ਚਾਦਰ ਤਾਣਿ ਸਉਂ ।2।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਆਇ ਲੱਗੀ ਹੁਣ ਛਕਿ ਪਉਂ ।3।