108. ਨੀ ਸਈਓ ਮੈਨੂੰ ਢੋਲ ਮਿਲੇ ਤਾਂ ਜਾਪੈ

ਨੀ ਸਈਓ ਮੈਨੂੰ ਢੋਲ ਮਿਲੇ ਤਾਂ ਜਾਪੈ ।

ਬਿਰਹੁ ਬਲਾਇ ਘੱਤੀ ਤਨ ਅੰਦਰ,

ਮੈਂ ਆਪੇ ਹੋਈ ਆਪੈ ।ਰਹਾਉ ।

 

ਬਾਲਪਣਾ ਮੈਂ ਖੇਲ ਗਵਾਇਆ,

ਜੋਬਨ ਮਾਣ ਬਿਆਪੈ ।

ਸਹੁ ਰਾਵਣ ਦੀ ਰੀਤ ਨ ਜਾਣੀ,

ਇਸ ਸੁੰਞੇ ਤਰਨਾਪੈ ।1।

 

ਇਸ਼ਕ ਵਿਛੋੜੇ ਦੀ ਬਾਲੀ ਢਾਢੀ,

ਹਰ ਦਮ ਮੈਨੂੰ ਤਾਪੈ ।

ਹਿਕਸ ਕਹੀਂ ਨਾਲ ਦਾਦ ਨ ਦਿੱਤੀ,

ਇਕ ਸੁੰਞੇ ਤਰਨਾਪੈ ।2।

 

ਸਿਕਣ ਦੂਰ ਨ ਥੀਵੇ ਦਿਲ ਤੋਂ,

ਵੇਖਣ ਨੂੰ ਮਨ ਤਾਪੈ ।

ਕਹੈ ਹੁਸੈਨ ਸੁਹਾਗਣਿ ਸਾਈ,

ਜਾਂ ਸਹੁ ਆਪ ਸਿੰਞਾਪੈ ।3।

 

109. ਨੀ ਤੈਨੂੰ ਰੱਬ ਨ ਭੁੱਲੀ

ਨੀ ਤੈਨੂੰ ਰੱਬ ਨ ਭੁੱਲੀ,

ਦੁਆਇ ਫ਼ਕੀਰਾਂ ਦੀ ਏਹਾ ।

 

ਰੱਬ ਨ ਭੁੱਲੀ ਹੋਰ ਸਭ ਭੁੱਲੀ,

ਰੱਬ ਨ ਭੁੱਲਨਿ ਜੇਹਾ ।ਰਹਾਉ।

 

ਆਇਆਂ ਕੁੜਮਾਂ ਨੂੰ ਕੁੱਟੇਂ ਮਲੀਦਾ,

ਫ਼ਕਰਾਂ ਨੂੰ ਟੁੱਕਰ ਬੇਹਾ ।1।

 

ਸੁਇਨਾ ਰੁਪਾ ਸਭੁ ਛਲ ਵੈਸੀ,

ਇਸ਼ਕ ਨ ਲਗਦਾ ਲੇਹਾ ।2।