126. ਸਭ ਸਖੀਆਂ ਗੁਣਵੰਤੀਆਂ

ਸਭ ਸਖੀਆਂ ਗੁਣਵੰਤੀਆਂ,

ਵੇ ਮੈਂ ਅਵਗੁਣਿਆਰੀ ।ਰਹਾਉ।

 

ਭੈ ਸਾਹਿਬ ਦੇ ਪਰਬਤ ਡਰਦੇ,

ਵੇ ਮੈਂ ਕੌਣ ਵਿਚਾਰੀ ।1।

 

ਜਿਸ ਗਲ ਨੂੰ ਸਹੁ ਭਜਿਆ ਈ ਵੋ,

ਸੋ ਮੈਂ ਬਾਤ ਬਿਸਾਰੀ ।2।

 

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਛੁੱਟਾ ਜੇ ਮਿਹਰ ਕਰੇ ਸੱਤਾਰੀ ।3।

 

127. ਸਭ ਵਲ ਛਡ ਕੇ ਤੂੰ ਇਕੋ ਵਲ ਹੋਇ

ਸਭ ਵਲ ਛਡ ਕੇ ਤੂੰ ਇਕੋ ਵਲ ਹੋਇ ।

 

ਵਲ ਵਲ ਦੇ ਵਿਚ ਕਈ ਵਲ ਪੈਂਦੇ,

ਇਕ ਦਿਨ ਦੇਸੀਂ ਰੋਇ ।ਰਹਾਉ।

 

ਔਖੀ ਘਾਟੀ ਬਿਖੜਾ ਪੈਂਡਾ,

ਹੁਣ ਹੀ ਸਮਝਿ ਖਲੋਇ ।

 

ਛੋੜਿ ਤਕਬਰ ਪਕੜ ਹਲੀਮੀ,

ਪਵੀ ਤਡਾਹੀਂ ਸੋਇ ।

 

ਕੜਕਿਨ ਕਪੜ ਸਹੁ ਦਰਿਆਵਾਂ,

ਥੀਉ ਮੁਹਾਣਾ ਬੇੜੀ ਢੋਇ ।

 

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਜੋ ਹੋਣੀ ਸੋ ਹੋਇ ।