ਤੂੰ ਵੱਡਭਾਗੀ,

ਤੇਰਾ ਤਾਂ

ਇਕ ਸ਼ਾਹ ਹੈ ਬਰਦਾ

 

ਲੂਣਾ

ਮੈਨੂੰ ਭਿੱਟ-ਅੰਗੀ ਨੂੰ

ਭਿੱਟ- ਅੰਗਾ ਵਰ ਦੇਵੋ

ਮੋੜ ਲਵੋ ਇਹ ਫੁੱਲ

ਤਲੀ ਸੂਲਾਂ ਧਰ ਦੇਵੋ

ਖੇਹ ਲਉ ਮਹਿਲ-ਚੁਬਾਰੇ

ਤੇ ਝਿੱਕਾ ਘਰ ਦੇਵੋ

ਜਿਸ ਕੰਧੀ ਦੀ ਇੱਟ ਮੈਂ,

ਓਥੇ ਹੀ ਜੜ ਦੇਵੋ

ਮੈਨੂੰ ਭਿੱਟ-ਅੰਗੀ ਨੂੰ

ਭਿੱਟ-ਅੱਗਾ ਵਰ ਦੇਵੇ

ਬੇ-ਸ਼ਕ ਚੰਬਾ, ਚੰਬਾ,

ਪਰ ਕੁਮਲਾਇਆ ਮੰਦਾ

ਮਹਿਕ -ਨਖੁੱਟੇ ਚੰਬੇ ਤੋਂ

ਵਣ-ਗੱਦਾ ਚੰਗਾ

ਬਿਨਾਂ ਹਾਣ

ਜਿਸਮਾਂ ਦਾ ਪਾਣੀ

ਬਣੇ ਨਾ ਗੰਗਾ

ਅਧ-ਅੰਗੇ ਤੋਂ ਚੰਗਾ ਨੀ

ਮੈਨੂੰ ਭਿੱਟ-ਅੰਗਾ

ਮੈਨੂੰ ਭਿੱਟ-ਅੰਗੀ ਨੂੰ,

ਭਿੱਟ-ਅੰਗਾ ਵਰ ਦੇਵੋ

ਅਧ-ਅੰਗੇ ਦੀ, ਰਾਣੀ ਤੋਂ .

ਮੈਂ ਭਲੀ ਚਮਾਰੀ

ਬੁੱਝੇ ਹਵਨ ਕੁੰਡ ਤੋਂ

ਚੁੱਲ੍ਹੇ ਭਰੀ ਅੰਗਾਰੀ