ਬੋਲੀ ਨਾ ਮਾਰੀ

ਮੈਂ ਤੇਰੀ ਸਹਿ ਅੰਗਣ ਹਾਂ

ਅੱਗ ਦੀ ਪੀੜ

ਪਛਾਨਣ ਹਾਰੀ

 

ਲੂਣਾ

ਸਈਏ ਨੀ

ਸੁਣ ਮੇਰੀਏ ਸਈਏ

ਅੱਗ ਦੀ ਪੀੜ

ਪਛਾਣੇ ਕਿਹੜਾ ?

ਅੱਗ ਦੇ ਦੁੱਖ ਨੂੰ ਜਾਣੇ ਕਿਹੜਾ ?

ਸਈਏ ਜਦ ਵੀ

ਅੱਗ ਜੰਮਦੀ ਹੈ

ਅੱਗ ਦੀ ਅੰਬੜੀ ਰੋ ਪੈਂਦੀ ਹੈ

ਹਰ ਅੰਬੜੀ ਦੀ

ਕੁੱਖ ਵਿਚ ਸਈਏ

ਪੁੱਤਰ ਦੀ ਖੁਸ਼ਬੋ ਰਹਿੰਦੀ ਹੈ

ਅੱਗ ਜੰਮੇ

ਤਾਂ ਦੁੱਧ ਸੁੱਕ ਜਾਂਦਾ

ਵਿਚ ਕਲੇਜੇ ਖੋਹ ਪੈਂਦੀ ਹੈ

ਬਾਬਲ ਦੀ

ਪੱਗ ਦਾ ਰੰਗ ਖੁਰਦਾ

ਕੰਨੀ ਮੰਦੀ ਸੋਅ ਪੈਂਦੀ ਹੈ

ਜਨਮ-ਦਿਹਾੜੇ

ਬੂਹਿਉ ਕੱਢਣ ਦੀ

ਬਸ ਚਿੰਤਾ ਹੋ ਜਾਂਦੀ ਹੈ

ਅੱਗ ਦੀ ਪੀੜ ਪਛਾਣੇ ਕਿਹੜਾ ?

ਅੱਗ ਨੂੰ ਪੀੜ

ਸਦਾ ਰਹਿੰਦੀ ਹੈ

ਕੋਈ ਨਾ ਐਸੀ ਨਾਰ ਧਰਤ 'ਤੇ

ਜੋ ਕਿ ਪੀੜ-ਵਿਛੁੰਨੀ ਹੋਵੇ