ਕੁੜੀਆਂ ਦੇ ਮੂੰਹ 'ਤੇ ਆ ਜਾਂਦਾ ਹੈ ।)

 

ਚੌਥਾ ਅੰਕ

ਅਜੀਤ, ਬਲਦੀਪ ਤੇ ਆਸ਼ਾ ਭੋਂਸਲੇ ਦੇ ਨਾਂ

(ਰਾਣੀ ਇੱਛਰਾਂ ਆਪਣੇ ਮਹਿਲ 'ਚ ਬੈਠੀ,

 ਰਾਜਾ ਸਲਵਾਨ ਦੇ ਦੂਜੇ ਵਿਆਹ ਦੀ ਖ਼ਬਰ

ਸੁਣ ਕੇ ਆਪਣੀ ਗੋਲੀ ਨਾਲ ਰੁਦਨ ਕਰ ਰਹੀ ਹੈ ।)

 

ਇੱਛਰਾਂ

ਕਿਹੜੇ ਦੇਸ਼ ਦਿੱਤੀ

ਧੀ ਬਾਬਲਾ ਵੇ

ਜਿਥੇ ਲੋਕਾਂ ਨੂੰ ਦੁੱਖਾਂ ਦੀ

ਸਾਰ ਕੋਈ ਨਾ

ਜਿਹੜੇ ਦੇਸ਼ ਚ ਚੰਦਰੇ ਸੂਰਜਾਂ ਦਾ

ਧੁੱਪ ਆਪਣੀ ਨਾਲ ਹੀ

ਪਿਆਰ ਕੋਈ ਨਾ

ਆਦਮ ਖੇਰ ਜੰਗਲ

ਗੋਰੇ ਪਿੰਡਿਆਂ ਦੇ

ਡਾਲੀ ਪੱਤ ਨਾ ਫੁੱਲ, ਫਲਹਾਰ ਕੋਈ ਨਾ

ਪਿੰਡੇ ਵੇਚਣੇ

ਤੇ ਪਿੰਡੇ ਮੁੱਲ ਲੈਣੇ

ਹੱਡ ਮਾਸ ਤੋਂ ਬਿਨਾ ਵਪਾਰ ਕੋਈ ਨਾ

ਜਿਹੜੇ ਦੇਸ਼ ਨਾਰੀ

ਭੋਗੇ ਨਰਕ ਕੁੰਭੀ

ਜੋਤੀ ਪੈਰ ਦੀ

ਵੱਧ ਸਤਿਕਾਰ ਕੋਈ ਨਾ