( ਇੱਛਰਾਂ ਸਿਸਕੀਆਂ ਭਰਦੀ ਹੈ। ਗੋਲੀ ਉੱਠ ਕੇ ਚਲੀ ਜਾਂਦੀ ਹੈ ।)

ਪੰਜਵਾਂ ਅੰਕ

ਉਮਾ, ਉਰਮਲਾ ਤੇ ਅਨੂੰ ਦੇ ਨਾਂ

(ਪੂਰਨ ਭੋਰਿਉਂ ਨਿਕਲ ਕੇ ਕੁਝ ਦਿਨਾਂ ਤੋਂ

ਲੂਣਾ ਦੇ ਮਹਿਲਾਂ 'ਚ ਠਹਿਰਿਆ ਹੋਇਆ ਹੈ ।

 ਲੂਣਾਂ ਆਪਣੀ ਸਹੇਲੀ ਈਰਾ ਨਾਲ ਮਹਿਲ

ਦੇ ਚਬੂਤਰੇ 'ਚ ਬੈਠੀ ਗੱਲਾਂ ਕਰ ਰਹੀ ਹੈ। ਬਾਹਰ

ਨਿੱਕਾ ਨਿੱਕਾ ਮੀਂਹ ਵਰ੍ਹਾ ਰਿਹਾ ਹੈ।)

 

ਲੂਣਾ

ਸਈਏ !

ਇਹ ਦਿਨ ਕੈਸੇ ਆਏ

ਭਿੱਜੇ ਸਿੱਜੇ ਤੇ ਅਲਸਾਏ

ਗਗਨੀ ਕਾਲੇ ਘਨੀਅਰ ਛਾਏ

ਸੱਤੇ ਰੰਗ ਪ੍ਰਾਹੁਣੇ ਆਏ

ਹੁਣੇ ਤਾਂ ਧੁੱਪੜੀ ਬਾਗਾਂ ਵਿਚ ਸੀ

ਹੁਣੇ ਤਾਂ ਧੁੱਪੜੀ ਉੱਡ ਗਈ ਬੇਲੇ

ਹੁਣੇ ਤਾਂ ਧੁੱਪੜੀ ਨਜ਼ਰ ਨਾ ਆਏ

ਹੁਣੇ ਤਾਂ ਮੰਦਰ ਦੇ ਕਲਸਾਂ 'ਤੇ

ਬੈਠੀ ਮੰਦ ਮੰਦ ਮੁਸਕਾਏ

 

ਹੁਣੇ ਤਾਂ ਅੰਬਰ ਖਿੜ ਖਿੜ ਹੱਸਿਆ

ਹੁਣੇ ਤਾਂ ਨੈਈਂ ਹੰਝ ਭਰ ਆਏ

ਹੁਣੇ ਦਾਮਨੀ ਗਲ ਦਾ ਗਹਿਣਾ

ਹੁਣੇ ਤਾਂ ਸੱਪਣੀ ਵਾਂਗ ਡਰਾਏ

ਹੁਣੇ ਤਾਂ ਜੰਗਲ ਮੋਰ ਬੋਲਿਆ