ਨਜ਼ਰੀਆ

ਵੈਸਟਰਨ ਤੇ ਤੰਗ ਕੱਪੜੇ

ਪਹਿਨਣ ਵਾਲੀਆਂ ਔਰਤਾਂ ਨੂੰ ਟੋਕਣ ਵਾਲਿਓ!

ਕਿਉਂ ਨਹੀਂ ਤੁਸੀਂ ਮਰਦ ਦੀ ਨਜ਼ਰ ਨੂੰ ਟੋਕਦੇ

ਜੋ ਅੱਖਾਂ ਨਾਲ ਛਾਤੀਆਂ ਤੇ ਲੱਕ ਮਿਣਦੇ ਨੇ

ਕਿਉਂ ਏਸ ਨਜ਼ਰ ਨੂੰ

ਮਰਦਾਊਪੁਣੇ ਦਾ ਨਾਮ ਦਿੰਦੇ ਹੋ

 

ਹਮਸਫ਼ਰ ਦਾ ਬਚਪਨ

ਨੈਣ ਨਕਸ਼ ਜਮ੍ਹਾ ਹੀ

ਪੁੱਤ ਦੇ ਆਵਦੇ ਪਿਉ ਤੇ ਗਏ ਸੀ

ਮੋਟੀਆਂ ਅੱਖਾਂ, ਤਿੱਖਾ ਨੱਕ, ਸੋਹਣੀ ਠੋਡੀ

ਤੇ ਪਿੱਦਾ ਜਾ ਬੋਲਦਾ ਵੀ ਆਵਦੇ ਪਿਉ ਵਾਂਗ ਸੀ

ਓਹ ਪੁੱਤ ਨਹੀਂ ਸਗੋਂ ਆਵਦੇ

ਹਮਸਫ਼ਰ ਦੇ ਬਚਪਨ ਨੂੰ

ਮਾਂ ਬਣ ਹੰਢਾ ਰਹੀ ਸੀ

 

ਨਸੀਬ

ਜੇ ਧੁਰ ਲਿਖੀਆਂ ਹੀ ਮੰਨਦੀ ਏ

ਤਾਂ ਕਿਉਂ ਸੀ ਨੇੜੇ ਆਉਣਾ ਨੀ

ਜੇ ਇੱਜ਼ਤਾਂ ਦੀ ਸੀ ਫ਼ਿਕਰ ਤੈਨੂੰ

ਫਿਰ ਹੱਥ ਨਹੀਂ ਸੀ ਫੜਾਉਣਾ ਤੂੰ

ਜੇ ਫਾਸਲੇ ਮਿਣਨੇ ਰੂਹ ਦੇ

ਫੇਰ ਕਿੰਜ ਮੈਂ ਤੇਰੇ ਕਰੀਬ ਹਾਂ

ਸ਼ਰਤਾਂ 'ਤੇ ਤੂੰ ਕਰਦੀ ਏ ਮੁਹੱਬਤਾਂ

ਫਿਰ ਦੱਸ ਕਿੰਜ ਤੇਰਾ ਨਸੀਬ ਹਾਂ