ਮਾਂ ਦੀ ਚੁੰਨੀ

ਲੀੜਿਆਂ 'ਚ ਗੁੱਛੇ ਮੁੱਛੇ ਹੋਈ

ਨਿੱਕੇ ਪਨੇ ਦੀ ਮਾਂ ਦੀ

ਸੂਹੇ ਰੰਗ ਦੀ ਚੁੰਨੀ ਮੈਂ ਵੇਖੀ

ਉੱਤੇ ਗੋਟੇ ਦੇ ਨਿੱਕੇ ਨਿੱਕੇ

ਫੁੱਲ ਲੱਗੇ ਸੋਹਣੇ ਲੱਗਦੇ

ਤੇ ਕੰਨੀਆਂ 'ਤੇ ਲੱਗਾ ਕਿਰਨਾਂ

ਵਾਲਾ ਗੋਟਾ ਚਮਕ ਮਾਰਦਾ

ਮਾਂ ਨੇ ਥੋੜਾ ਜੇਹਾ ਸ਼ਰਮਾ ਕੇ ਕਿਹਾ,

"ਏਹ ਮੇਰੀ ਨੰਦਾਂ ਵਾਲੀ ਚੁੰਨੀ ਏ .. "

ਮਾਂ ਦਾ ਚਿਹਰਾ ਵੀ ਗੋਟੇ ਵਾਂਗ ਚਮਕਣ ਲੱਗਾ

ਮੈਨੂੰ ਓਸ ਚੁੰਨੀ ਦਾ ਬੜਾ ਮੋਹ ਆਇਆ

ਮਾਂ ਦੇ ਮਨਾ ਕਰਨ 'ਤੇ ਵੀ ਮੈਂ ਚੁੰਨੀ

ਮਾਂ ਉੱਤੇ ਦੇ ਦਿੱਤੀ

"ਐਂਵੇ ਕਮਲ ਨਾ ਕੁੱਟਿਆ ਕਰ

ਚਿੱਟੇ ਵਾਲਾਂ 'ਤੇ ਹੁਣ ਕੀ ਸੋਂਹਦੀ ਏ ਏਹ "

ਮੈਂ ਸੋਚਣ ਲੱਗ ਗਈ

"ਜਦ ਨਿੱਕੀ ਸੀ ਮੈਂ, ਉਦੋਂ ਵੀ ਮਾਂ ਐਂਵੇ ਹੀ ਸੀ

ਫਿੱਕੇ ਰੰਗ ਪਾਉਂਦੀ, ਘੱਟ ਤੁਰਦੀ

ਅਟਕ ਜਾਣ ਤੋਂ ਡਰਦੀ

ਜ਼ਿਆਦਾ ਤੁਰਦੀ ਤਾਂ ਸਾਹ ਫੁੱਲ ਜਾਂਦਾ

ਭੈਣ ਦੇ ਵਿਆਹ ਦਾ ਫ਼ਿਕਰ ਕਰਦੀ

ਤੇ ਹੋਰ ਕਿੰਨਾ ਕੁਛ ਸੀ "

 

ਮੇਰੀਆਂ ਅੱਖਾਂ ਭਰ ਆਈਆਂ

ਸੋਚਦੀ ਕਿ ਮਾਂਵਾਂ ਫ਼ਿਕਰਾਂ ਨਾਲ

ਉਮਰੋਂ ਪਹਿਲਾਂ ਬੁੱਢੀਆਂ ਹੋ ਜਾਂਦੀਆਂ