ਦਾਦੀ ਦੀ ਝੁਰੜੀਆਂ ਭਰੀ ਪੇਂਟਿੰਗ

ਕਿਸੇ ਵੀ ਤਰ੍ਹਾ ਦੀ ਘੁਟਣ ਹੋਣੀ

ਜਾਂ ਫਿਰ ਕੋਈ ਫ਼ਿਕਰ ਮੋਢਾ ਆ ਨੱਪਦਾ ਸੀ

ਮੈਂ ਆ ਤੇਰੇ ਮੋਢੇ ਨਾਲ ਮੋਢਾ ਜੋੜ ਬੈਠਦੀ

ਤੇਰੀਆਂ ਨਿੱਕੀਆਂ ਨਿੱਕੀਆਂ ਗੱਲਾਂ 'ਚ

ਸਾਰੇ ਫ਼ਿਕਰ ਦਮ ਤੋੜ ਦਿੰਦੇ ਸੀ

ਹੁਣ ਜਦ ਉਦਾਸ ਹੋਵਾਂ ਬੇਬੇ

ਬੈਂਡ ਨਾਲ ਪਈ ਤੇਰੀ ਖੂੰਡੀ ਤੇ ਨਜ਼ਰ ਪੈਂਦੀ ਏ

ਹੱਥ ਤੇਰਾ ਸ਼ਪੱਰਸ਼ ਭਾਲਦੇ ਖੂੰਡੀ ਤੀਕਰ ਜਾਂਦੇ ਨੇ

ਸਾਹਮਣੇ ਤੇਰੀ ਝੁਰੜੀਆਂ ਭਰੀ ਪੇਂਟਿੰਗ ਦੇਖਦੀ ਹਾਂ

ਤਾਂ ਇੰਝ ਲੱਗਦਾ ਜਿਵੇਂ ਤੂੰ ਮੈਨੂੰ ਉਦਾਸ ਨੂੰ

ਹਸਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੋਵੇ