ਜੀਹਦੇ ਮੱਥੇ ਦੌਣੀ

ਦੋਣੀ ਵਿੱਚ ਸਤਾਰਾ

ਮੈਨੂੰ ਵੀਰ ਪਿਆਰਾ

ਵੀਰੇ ਦੀ ਮੈਂ ਵਹੁਟੀ ਡਿੱਠੀ

ਚੰਨ ਨਾਲੋਂ ਚਿੱਟੀ

ਤੇ ਪਤਾਸਿਆਂ ਤੋਂ ਮਿੱਠੀ

ਭੈਣ ਨੂੰ ਵੀਰ ਦੇ ਵਿਆਹ ਦਾ ਚਾਅ ਤਾਂ ਭਲਾ ਹੋਣਾ ਹੀ ਹੋਇਆ, ਉਸ ਨੂੰ ਤਾਂ ਆਪਣੇ ਵੀਰਾਂ ਦੇ ਮੰਗੇ ਜਾਣ ਦਾ ਵੀ ਚਾਅ ਹੈ :-

ਅੰਬੇ ਨੀ ਮਾਏ ਅੰਬੇ

ਮੇਰੇ ਸੱਤ ਭਰਾ ਮੰਗੇ

ਮੇਰਾ ਇਕ ਭਰਾ ਕੁਆਰਾ

ਉਹ ਚੋਪਟ ਖੇਲਣ ਵਾਲਾ

ਚੌਪਟ ਕਿੱਥੇ ਖੇਲੇ

ਲਾਹੌਰ ਸ਼ਹਿਰ ਖੇਲੇ

ਲਾਹੌਰ ਸ਼ਹਿਰ ਉੱਚਾ

ਮੈਂ ਮਨ ਪਕਾਇਆ ਸੁੱਚਾ

ਮੇਰੇ ਮਨ ਨੂੰ ਲੱਗੇ ਮੋਤੀ

ਮੈਂ ਗਲੀਆਂ ਵਿੱਚ ਖਲੋਤੀ

ਮੈਂ ਬੜੇ ਬਾਬੇ ਦੀ ਪੋਤੀ

ਕਿਧਰੇ ਵੀਰ ਦੇ ਬਾਗਾਂ ਵਿੱਚ ਚੰਬਾ ਕਲੀ ਖਿੜਦੀ ਹੈ :-

ਹੇਠ ਵਗੇ ਦਰਿਆ

ਉੱਤੇ ਮੈਂ ਖੜੀ

ਮੇਰੇ ਵੀਰ ਨੇ ਲਾਇਆ ਬਾਗ

ਖਿੜ ਪਈ ਚੰਬਾ ਕਲੀ

ਚੰਬਾ ਕਲੀ ਨਾ ਤੋੜ

ਵੀਰ ਮੇਰਾ ਕੁੱਟੂਗਾ

ਮੇਰਾ ਵੀਰ ਬੜਾ ਸਰਦਾਰ

ਬਹਿੰਦਾ ਕੁਰਸੀ 'ਤੇ

ਭਾਂਬੋ ਬੜੀ ਪ੍ਰਧਾਨ

ਬਹਿੰਦੀ ਪੀਹੜੀ 'ਤੇ

ਪੀਹੜੀ ਗਈ ਟੁੱਟ

ਭਾਬੋ ਗਈ ਰੁੱਸ

ਭਾਬੋ ਕੁੱਕੜਾਂ ਨੂੰ ਨਾ ਮਾਰ

ਕੁੱਕੜ ਵੀਰੇ ਦੇ