ਹੱਡ ਵੈਰ ਨਾ ਮੁੱਝ ਨੂੰ ਨਾਲ ਭਾਬੀ,
ਕੌੜੀ ਬਣੀ ਭਾਬੀ ਆਪਣੇ ਆਪ ਕੰਮੀ ।
ਤੁੱਮੇ ਤਈਂ ਤੂੰ ਖੰਡ ਦੀ ਪੁੱਠ ਦੇਵੇਂ,
ਫਿੱਟੇ ਦੁੱਧ ਦੀ ਦਹੀਂ ਨਾ ਕਦੇ ਜੰਮੀ ।੬੭।
ਵੱਡੀ ਭੈਣ-
ਵੱਡੀ ਨਣਦ ਤੇਰੀ ਸੁਰਗਵਾਸ ਹੋਈ,
ਦੱਸ ਓਸ ਕੋਲੋਂ ਕਾਹਨੂੰ ਰੋਂਵਦੀ ਸੈਂ ।
ਭਾਣੇ ਓਸਦੇ ਤੁੰਮਾਂ ਕਿ ਦੁੱਧ ਫਿੱਟਾ,
ਏਹੋ ਕੁਝ ਕਿ ਹੋਰ ਕੁਝ ਹੋਂਵਦੀ ਸੈਂ ।
ਜਿਵੇਂ ਭਾਬੀ ਸੈਂ ਓਸ ਨਿਨਾਣ ਸੰਦੀ,
ਆਪ ਜਿਵੇਂ ਓਦੋਂ ਸੁਖ ਸੋਂਵਦੀ ਸੈਂ।
ਤਿਵੇਂ ਸਮਝ ਹੁਣ ਆਪਣੀ ਥਾਂਉਂ ਭਾਬੀ,
ਉਹ ਹੁਣ ਹਈ ਓਹੋ ਜੋ ਤੂੰ ਹੋਂਵਦੀ ਸੈਂ ।੬੮।
ਛੋਟੀ ਭੈਣ-
ਭੈਣਾਂ ਨਾਲ ਨਾ ਕਹਿਰ ਕਮਾ ਭੈਣੇ,
ਸਾਕ ਦੁੱਧ ਤੇ ਲਹੂ ਦੇ ਤੋੜ ਨਾਹੀਂ ।
ਭਾਬੀ ਵਾਰ ਕੇ ਤਲੀ ਤੋਂ ਗਲੀ ਮਾਰੀਂ,
ਭੈਣ ਸਕੀ ਦਾ ਆਖਿਆ ਮੋੜ ਨਾਹੀਂ ।
ਅੰਬ ਵੱਢ ਨਾ ਅੱਕ ਨੂੰ ਵਾੜ ਦੇਈਂ,
ਭੰਨ ਮੋਤੀਆਂ ਥੋਹਰ ਨੂੰ ਜੋੜ ਨਾਹੀਂ ।
ਜੇ ਨਾਂ ਮੁੜੇਂ ਨਾਂ ਮੁੜਾਂਗੀ ਹਠਾਂ ਮੈਂ ਭੀ,
ਵਿਗੜੀ ਭੈਣ ਦੀ ਰੱਖਦੀ ਲੋੜ ਨਾਹੀਂ ।੬੯
