ਜਿਸ ਨੂੰ ਮਿਲ ਕੇ ਲੱਗਿਆ
ਮਿਲਣਾ ਚਾਹੁੰਦਾ ਸੀ ਜਿਸ ਨੂੰ ਮੈਂ
ਪਿਛਲੇ ਕਈ ਜਨਮਾਂ ਤੋਂ
ਤੂੰ ਹੀ ਤਾਂ ਹੈਂ
ਜਿਸ ਨੂੰ ਵੇਖ ਕੇ ਅੱਖਾਂ 'ਚ
ਜਗਮਗਾਏ ਅਣਗਿਣਤ ਤਾਰੇ
ਤੇ ਲੱਗਿਆ ਕਿ
ਬਿਨਾਂ ਵੇਖਿਆਂ ਹੀ
ਵੇਖ ਲਈ ਸਾਰੀ ਦੁਨੀਆਂ
ਤੇ ਪ੍ਰਾਪਤ ਕਰ ਲਏ
ਧਰਤੀ ਦੇ ਸਾਰੇ ਸੁੱਖ
ਤੂੰ ਹੀ ਤਾਂ ਹੈਂ
ਜਿਸ ਨੇ ਰਿੜਕਿਆਂ ਮੇਰੇ
ਮਨ ਦੇ ਸਮੁੰਦਰ ਨੂੰ
ਤੇ ਕੱਢ ਲਏ ਇਕ-ਇਕ ਕਰਕੇ
ਸਾਰੇ ਰਤਨ
ਜਿਨ੍ਹਾਂ ਨੂੰ ਮੁੱਦਤ ਤੋਂ
ਲੁਕਾਇਆ ਹੋਇਆ ਸੀ ਹਿਰਦੇ ਅੰਦਰ ।
ਤੂੰ ਹੀ ਤਾਂ ਹੈਂ
ਜਿਸ ਨੂੰ ਨਜ਼ਰਾਂ ਨਾਲ ਛੋਹ ਕੇ ਲੱਗਾ
ਜਿਵੇਂ ਛੋਹ ਲਿਆ ਹੋਵੇ
ਤਨ ਦੀ ਸੁੰਦਰਤਾ ਦਾ ਸ਼ਿਖਰ
ਜਿਸ ਨੂੰ ਇਕ ਵਾਰ ਮਿਲ ਕੇ
ਚਾਹਿਆ ਹਜ਼ਾਰ ਬਹਾਨਿਆਂ ਨਾਲ
ਬਾਰ-ਬਾਰ ਮਿਲਣਾ
ਤੂੰ ਹੀ ਤਾਂ ਹੈਂ
ਜਿਸ ਨੂੰ ਮਿਲ ਕੇ ਲੱਗਿਆ
ਤਲੀ 'ਤੇ ਦੀਵਾ ਰੱਖ ਕੇ ਵੀ
ਲੱਭਣ 'ਤੇ ਨਾ ਮਿਲਦਾ
ਇਸ ਦੁਨੀਆਂ ਵਿਚ
ਤੇਰੇ ਵਰਗਾ ਕੋਈ
