ਮੁਸ਼ਕੀ ਬਹਾਰ

ਤੇਰੇ ਬਗੀਚੇ

ਮੁਸ਼ਕਿਆ ਏ ਬੇਦ-ਮੁਸ਼ਕ

ਖਿੜ ਪਈਏ ਬਹਾਰ,

ਮੈਂ ਸੁਣਿਐਂ

ਅਤਾਰ ਆ ਪਹੁੰਚਾ ਤੈਂ ਦੁਆਰ,

ਵੜ ਗਿਆ ਬਗੀਚੇ

ਤੋੜ ਲਵੇਗਾ ਫੁੱਲ

ਲੁਟ ਲਏਗਾ ਬਹਾਰ।

 

ਪਾਏਗਾ ਦੇਗ, ਚਾੜੇਗਾ ਭੱਠੀ

ਖਿੱਚ ਲਊ ਸੁਗੰਧੀ

ਫੇਰ ਮਾਰੂ ਵਗਾਹ ਕਰਕੇ ਫੁੱਲਾਂ ਦਾ ਫ਼ੋਗ

ਕਰਕੇ ਭੁਲਾਂ ਦਾ ਸੋਗ।

 

ਹੁਣ ਵੇਲਾ ਏ, ਹੋ ਹੁਸ਼ਯਾਰ!

ਖ਼ਬਰਦਾਰ! ਖ਼ਬਰਦਾਰ!

ਆਪਣੀ ਮੁਸ਼ਕੀ ਬਹਾਰ, ਰੱਖੀਂ ਸੰਭਲ ਸੰਭਾਲ

ਉਠ ਕਰ ਅਰਦਾਸ।

 

'ਸਾਈਆਂ! ਨਜ਼ਰ ਟਪਾਰ, ਲਗੇ ਨ ਮੇਰੀ ਬਹਾਰ,

'ਰਹੇ ਮੁਸ਼ਕੀ ਹਮੇਸ਼'

ਮੇਰੇ ਸਾਂਈਆਂ! ਹਮੇਸ਼। ੪੧.

(ਕਸੌਲੀ-੧੨-੯-੧੯੫੨)