ਮਾਊਂਟ ਆਬੂ ਯਾਤ੍ਰਾ :-

ਆਬੂ ਦੀਆਂ ਗੁਫ਼ਾਂ

ਗੁਫਾ! ਕੁੰਦਰਾਂ ਆਬੂ! ਤੇਰੀਆਂ

ਅਸਾਂ ਫਿਰੇ ਫਿਰ ਡਿਠੀਆਂ।

ਥਾਉਂ ਸੁਹਾਵੇ ਪਾਣੀ ਹਰ ਥਾਂ

ਛਾਂਵਾਂ ਮਿਠੀਆਂ ਮਿਠੀਆਂ।

ਕਿਤੇ ਮੂਰਤੀ ਕਿਤੇ ਸਾਧ ਹੈ

ਕਿਤੇ ਦੁਏ ਹਨ ਬੈਠੇ,

ਪਰ ਜਿੰਦ-ਕਣੀਆਂ ਝੂਮ ਝੁੰਮਦੀਆਂ

ਅਸਾਂ ਨਾ ਕਿਧਰੇ ਡਿਠੀਆਂ। ੫੪।

(ਮਾਊਂਟ ਆਬੂ ਸਤੰਬਰ ੧੯੩੩)ਖ.ਸ.੨੬-੬-੧੯੮੦

 

ਮਾਊਂਟ ਆਬੂ ਯਾਤ੍ਰਾ ਝਲਕੇ-

ਰਾਮ ਝਰੋਖਾ ਆਦਿ

ਦੇਖਯਾ ਉਹ ਰਾਮ ਝਰੋਖਾ ਚੜ੍ਹਕੇ

ਗੁਹ ਹਾਥੀ ਦੇ ਦਰਸ਼ਨ ਕਰੇ।

ਫੁਯਾ ਮਨ ਦੇਖ ਗੁਫ਼ਾ ਚੰਪਾ ਦੀ

'ਇਸ ਇਕਾਂਤ ਬਹਿ ਪਾਪ ਝਰੇ।

ਭਾਸ਼ਾ ਉਸ ਇਕਾਂਤ ਵਿਚ ਐਦਾਂ

ਗੁਰ ਨਾਨਕ ਪ੍ਯਾ ਹੁਕਮ ਕਰੇ:-

'ਰਹੁ ਨਿਰਅੰਜਨ ਅੰਜਨ ਮੱਧੇ

ਸਿਮਰ ਨਿਰੰਜਨ ਭਗਤ ਤਰੇ। ੫੫

(ਮਾਊਂਟ ਆਬੂ ਸਤੰਬਰ ੧੯੩੩) ਖਾ.ਸ. ੧੪-੨-੧੯੮੦