ਨਾਮ ਕਿਉਂ ਛਿਪਾਇਆ

(ਡਾਕਟਰ ਪਦ ਮਿਲਣ 'ਤੇ)

ਨਾਮ ਅਸਤਿ ਹੈ ਸਾਡਾ ਨੀ ਸਹੀਓ!

ਹਾਂ ਸੱਤ੍ਯ ਹੈ ਨਾਮ ਇਕ ਸਾਈਂ।

ਏਸ ਲਈ ਅਸੀਂ ਨਾਮ ਛਿਪਾਈਏ

ਅਸੱਤਿ ਦੀ ਕੀਹ ਵਡਿਆਈ?

ਐਪਰ:-

ਦਾਨਿਆਂ ਇਕ ਵਿਸ਼ੇਸ਼ਣ ਘੱਲਿਆ

"ਇਸ ਨਾਮ ਦੇ ਨਾਲ ਲੈ ਲਾਈ"

ਸੱਜਣ ਨਾਲ ਵਧਾਈਆਂ ਘੱਲਣ

ਤੇ ਰਸਮ ਕਹੇ ਇਹ ਆਈ:

"ਘੱਲ ਸ਼ੁਕਰਾਨੇ," ਅਸੀਂ ਹਿਰਾਨੇ

ਨਿਤ ਨਾਮ ਤਾਂ ਰਹੇ ਛਿਪਾਈ,

ਨਾਮ ਅੱਸਤਿ ਨੂੰ ਮਿਲ੍ਹਾ ਵਿਸ਼ੇਸ਼ਣ

ਹੁਣ ਕੀਕੂੰ ਫਬਾਈਏ ਭਾਈ!

ਸੱਜਣੋ! ਜਿਨ੍ਹਾਂ ਨੇ ਘੱਲੀ ਵਧਾਈ

ਇਕ ਦਿਓ ਅਸੀਸ ਸੁਖਦਾਈ:-

"ਸਤਿਨਾਮ ਰਹੀਂ ਲਿਵਲਾਈ

ਰਬ ਰਜ਼ਾਈ ਇਹ ਰੰਗ ਲਾਈ ॥੭੫॥

ਖਾ.ਸ. ੭ ਜੂਨ ੧੯੭੯

 

ਨੋਟ:- ਭਾਈ ਵੀਰ ਸਿੰਘ ਹੁਰਾਂ ਸਦਾ ਆਪਣੇ ਆਪ ਨੂੰ ਛਿਪਾ ਕੇ ਰਖਿਆ ਕਿਸੇ ਪੁਸਤਕ ਤੇ ਨਾਮ ਨਹੀਂ ਦਿੱਤਾ, ਸਦਾ ਛਿਪੇ ਰਹਿਣ ਦੀ ਚਾਹ ਰਹੀ। ਇਸਦਾ ਕਾਰਨ ਦਸ ਰਹੇ ਹਨ।                         -ਸੰਪਾਦਕ