ਅੱਜ ਸਾਡਾ ਅੰਦਰ ਕੀ ਸੋਚੇ?

ਇਕ ਸਾਲ ਬਤੀਤ ਹੈ ਹੋਰ ਭਿਆ,

ਫਿਰ ਆਇ ਗਈ ਗੁਰੂ ਪੁੰਨਮ ਪ੍ਯਾਰੇ!

 

ਝਾਤੀ ਮਾਰ ਦਿਲ ਆਪਨਾ ਵੇਖੀਏ:

ਬਰਸ ਦਿਨਾ ਹਨ ਕੀਤੇ ਕੀ ਕਾਰੇ?

 

ਕਿੰਨੀਕੁ ਦੁਖੀਆਂ ਦੀ ਸੇਵਾ ਕਮਾਈ,

ਕਿੰਨੇ ਉਗਾਏ ਪਰੇਮ ਦੇ ਕਿਆਰੇ?

 

ਰੱਬ ਦੇ ਨੇੜੇ ਹਾਂ ਕਿੰਨੇਕੁ ਆਏ?

ਮਾਯਾ ਦੀ ਖਿੱਚੋਂ ਹਾਂ ਕਿੰਨੇ ਕੁ ਨ੍ਯਾਰੇ? ॥੧॥

 

ਓਥੇ ਹੀ ਹਾਂ ਜਿਥੇ ਪਰੂੰ ਨੂੰ ਸੀਗੇ,

ਅੱਗੇ ਨੂੰ ਹੈ ਕੁਝ ਪੈਰ ਉਠਾਯਾ?

 

ਵਾਧੇ ਦਾ ਸਾਲ ਏ ਸਾਲ ਸੁਭਾਗਾ,

ਘਾਟਾ ਹੀ ਘਾਟਾ ਚੁਫੇਰਿਓਂ ਪਾਯਾ?

 

ਮਾਯਾ ਨੇ ਹੇਠਾਂ ਹੀ ਹੇਠਾਂ ਬਹਾਯਾ,

ਕਿ ਹਿੰਮਤ ਨੇ ਉਪਰ ਤੋਂ ਉਪਰ ਓਠਾਯਾ ?

 

ਪਸੂਆਂ ਜਿਵੇਂ ਖੇਡ, ਖਾਧੇ ਤੇ ਸੁੱਤੇ,

ਕਿ ਹੈ ਦੇਵਤਾ ਏ ਮਨੁਖੋਂ ਬਨਾਯਾ ? ॥੨॥

 

ਹਿੰਮਤ ਜੇ ਕਰਦੀ ਰਹੀ ਹੈ ਅਗੇਰੇ,

ਵਧਾਈ ਵਧਾਈ ਹੈ ਤਾਂ ਅਜ ਵਧਾਈ!

 

ਉਲਟੀ ਜੇ ਹੁੰਦੀ ਰਹੀ ਹੈ ਕਮਾਈ,

ਤਾਂ ਵੈਰਾਗ ਕਰ ਅੱਜ ਕਰਲੌ ਸਫਾਈ।

 

ਅੱਗੇ ਲਈ ਨੇਮ ਧਾਰੋ ਕਿ ਕਰੀਏ,

ਕਾਰਜ ਜਿਨ੍ਹਾਂ ਤੋਂ ਹੋ ਪ੍ਰਭੂ ਦੀ ਵਡਾਈ।

 

ਮਾਣੋਂ ਖੁਸ਼ੀ ਨੂੰ ਪ੍ਰਭੂ ਖ਼ੌਫ਼ ਅੰਦਰ,

ਸਨਮੁਖ ਰਹਨ ਵਿਚ ਹੈ ਸੱਚੀ ਵਧਾਈ॥੩॥੮੪॥