ਸਮਾਂ ਕੋਈ ਕੁੱਤਾ ਨਹੀਂ

ਫ਼ਰੰਟੀਅਰ ਨਾ ਸਹੀ, ਟ੍ਰਿਬਿਊਨ ਪੜ੍ਹੋ

ਕਲਕੱਤਾ ਨਹੀਂ, ਢਾਕੇ ਦੀ ਗੱਲ ਕਰੋ

ਆਰਗੇਨਾਈਜ਼ਰ ਤੇ ਪੰਜਾਬ ਕੇਸਰੀ

ਦੇ ਕਾਤਰ ਲਿਆਵੋ

ਤੇ ਮੈਨੂੰ ਦੱਸੋ

ਇਹ ਇੱਲਾਂ ਕਿੱਧਰ ਜਾ ਰਹੀਆਂ ਹਨ ?

ਕੌਣ ਮਰਿਆ ਹੈ ?

 

ਸਮਾਂ ਕੋਈ ਕੁੱਤਾ ਨਹੀਂ

ਕਿ ਸੰਗਲੀ ਫੜ ਕੇ ਜਿੱਧਰ ਮਰਜ਼ੀ ਧੂਹ ਲਵੋ

ਤੁਸੀਂ ਕਹਿੰਦੇ ਹੋ

ਮਾਓ ਇਹ ਕਹਿੰਦਾ ਹੈ, ਮਾਓ ਉਹ ਕਹਿੰਦਾ ਹੈ

ਮੈਂ ਪੁੱਛਦਾ ਹਾਂ, ਮਾਓ ਕਹਿਣ ਵਾਲਾ ਕੌਣ ਹੈ ?

ਸ਼ਬਦ ਗਿਰਵੀ ਨਹੀਂ

ਸਮਾਂ ਗੱਲ ਆਪ ਕਰਦਾ ਹੈ

ਪਲ ਗੂੰਗੇ ਨਹੀਂ ।

ਤੁਸੀਂ ਰੈਂਬਲ 'ਚ ਬੈਠੋ

ਜਾਂ ਪਿਆਲਾ ਚਾਹ ਦਾ ਰੇੜ੍ਹੀ ਤੋਂ ਪੀਓ

ਸੱਚ ਬੋਲੋ ਜਾਂ ਝੂਠ –

ਕੋਈ ਫ਼ਰਕ ਨਹੀਂ ਪੈਂਦਾ,

ਭਾਵੇਂ ਚੁੱਪ ਦੀ ਲਾਸ਼ ਵੀ ਛਲ ਕੇ ਲੰਘ ਜਾਵੋ

.... .....

ਤੇ ਐ ਹਕੂਮਤ

ਆਪਣੀ ਪੁਲੀਸ ਨੂੰ ਪੁੱਛਕੇ ਇਹ ਦੱਸ

ਕਿ ਸੀਖਾਂ ਅੰਦਰ ਮੈਂ ਕੈਦ ਹਾਂ

ਜਾਂ ਸੀਖਾਂ ਤੋਂ ਬਾਹਰ ਇਹ ਸਿਪਾਹੀ ?

 

ਸੱਚ ਏ.ਆਈ.ਆਰ. ਦੀ ਰਖੇਲ ਨਹੀਂ

ਸਮਾਂ ਕੋਈ ਕੁੱਤਾ ਨਹੀਂ

***