ਅਰਥਾਂ ਦਾ ਅਪਮਾਨ

ਤੁਸਾਂ ਨੇ ਜਾਣ ਬੁੱਝ ਕੇ ਅਰਥਾਂ ਦਾ ਅਪਮਾਨ ਕੀਤਾ ਹੈ

ਆਵਾਰਾ ਸ਼ਬਦਾਂ ਦਾ ਇਲਜ਼ਾਮ

ਹੁਣ ਕਿਸ ਨੂੰ ਦੇਵੋਗੇ ?

 

ਮੈਨੂੰ ਇਹ ਰੁੱਖ ਪੁੱਛਦੇ ਹਨ

ਕਿ ਉਸ ਸੂਰਜ ਨੂੰ ਕੀ ਕਹੀਏ

ਜਿਹੜਾ ਕਿ ਗਰਮ ਨਾ ਹੋਵੇ

ਜ੍ਹਿਦਾ ਰੰਗ ਲਾਲ ਨਾ ਹੋਵੇ।

ਮੈਂ ਰੁੱਖਾਂ ਵੱਲ ਤੱਕਦਾ ਹਾਂ

ਹਵਾ ਦੇ ਰੰਗ ਗਿਣਦਾ ਹਾਂ

ਤੇ ਰੁੱਤ ਦਾ ਨਾਪ ਕਰਦਾ ਹਾਂ

ਤੇ ਮੈਥੋਂ ਫੇਰ ਸੂਰਜ ਨੂੰ ਬੇਦੋਸ਼ਾ ਆਖ ਨਹੀਂ ਹੁੰਦਾ।

ਮੈਂ ਸੂਰਜ ਵਾਸਤੇ

ਗੁਸਤਾਖ ਸ਼ਬਦਾਂ ਨੂੰ ਸੁਅੰਬਰ 'ਚ ਬਿਠਾਉਂਦਾ ਹਾਂ,

 

ਤੁਸੀਂ ਸਮਝੋਗੇ

ਮੈਂ ਚੋਟੀ 'ਤੇ ਖੜ੍ਹ ਕੇ ਖੱਡ ਦੇ ਵਿੱਚ ਛਾਲ ਮਾਰੀ ਹੈ

ਅਸਲ ਗੱਲ ਹੋਰ ਹੈ

ਮੈਂ ਤਾਂ ਖੱਡਾਂ ਦੇ ਅਰਥ ਬਦਲੇ ਹਨ

ਹਵਾ ਨੂੰ ਪੀਂਘ ਮੰਨਿਆ ਹੈ

ਤੇ ਪਰਬਤ ਨੂੰ ਪੜੁੱਲ ਦਾ ਰੂਪ ਦਿੱਤਾ ਹੈ

 

ਮੈਂ ਤੁਸਾਂ ਲਈ ਖੁਦਕਸ਼ੀ ਦੇ ਅਰਥ ਬਦਲੇ ਹਨ

ਮੇਰੇ ਸਾਥੀ

ਤੁਸਾਂ ਲਈ ਜ਼ਿੰਦਗੀ ਦੇ ਅਰਥ ਬਦਲਣਗੇ

ਤੁਸਾਂ ਜੇ ਮਰਨ ਲੱਗਿਆਂ

ਜ਼ਿੰਦਗੀ ਨੂੰ ਜਾਣ ਵੀ ਲੀਤਾ