ਉੱਡਦਿਆਂ ਬਾਜ਼ਾਂ ਮਗਰ

ਉੱਡ ਗਏ ਹਨ ਬਾਜ਼ ਚੁੰਝਾਂ 'ਚ ਲੈ ਕੇ

ਸਾਡੀ ਚੈਨ ਦਾ ਇੱਕ ਪਲ ਬਿਤਾ ਸਕਣ ਦੀ ਖ਼ਾਹਸ਼

ਦੋਸਤੋ ਹੁਣ ਚੱਲਿਆ ਜਾਵੇ

ਉੱਡਦਿਆਂ ਬਾਜ਼ਾਂ ਮਗਰ...

 

ਏਥੇ ਤਾਂ ਪਤਾ ਨਹੀਂ ਕਦੋਂ ਆ ਧਮਕਣ

ਲਾਲ ਪਗੜੀਆਂ ਵਾਲੇ ਅਲੋਚਕ

ਤੇ ਸ਼ੁਰੂ ਕਰ ਦੇਣ

ਕਵਿਤਾ ਦੀ ਦਾਦ ਦੇਣੀ

 

ਏਸ ਤੋਂ ਪਹਿਲਾਂ

ਕਿ ਪੱਸਰ ਜਾਏ ਥਾਣੇ ਦੀ ਨਿੱਤ ਫ਼ੈਲਦੀ ਇਮਾਰਤ

ਤੁਹਾਡੇ ਪਿੰਡ, ਤੁਹਾਡੇ ਟੱਬਰ ਤੀਕ

ਤੇ ਨੱਥੀ ਹੋ ਜਾਏ

ਸਵੈਮਾਣ ਦਾ ਕੰਬਦਾ ਹੋਇਆ ਵਰਕਾ

ਉਸ ਕਿਰਚ-ਮੂੰਹੇਂ ਮੁਨਸ਼ੀ ਦੇ ਰੋਜ਼ਨਾਮਚੇ ਵਿੱਚ –

ਦੋਸਤੋ ਹੁਣ ਚੱਲਿਆ ਜਾਵੇ

ਉੱਡਦਿਆਂ ਬਾਜ਼ਾਂ ਮਗਰ...