ਬਾਡਰ

(ਮੋਗਾ ਗੋਲੀ-ਕਾਂਡ ਨੂੰ ਸਮਰਪਤ)

 

ਭਰ ਜਾਣਗੇ ਹੁਣ ਧੂੜ ਨਾਲ ਕਸਬਿਆਂ ਦੇ ਸਿਰ

ਫ਼ਿਰਨਗੇ ਟਰੱਕ ਬੀ.ਐਸ.ਐਫ਼. ਦੇ

ਪਲੀਆਂ ਹੋਈਆਂ ਜੂੰਆਂ ਦੇ ਵਾਂਗ...

ਐਤਕੀਂ ਨਹੀਂ ਆਵੇਗੀ ਸਤਵਰਗ ਦਿਆਂ ਫੁੱਲਾਂ 'ਤੇ ਖਿੜਨ ਰੁੱਤ

ਮਿੱਧਿਆ ਗਿਆ ਘਾਹ ਤੜਫ਼ੇਗਾ

ਕਾਲਜਾਂ ਦਿਆਂ ਵਿਹੜਿਆਂ ਵਿੱਚ

ਰਾਤ-ਦਿਨ ਪੌਣਾਂ ਭ੍ਰਿਸ਼ਟ ਕਰੇਗੀ

ਥਾਣੇ 'ਚ ਲੱਗੀ ਵਾਇਰਲੈੱਸ...

 

ਦਰਅਸਲ

ਏਥੇ ਹਰ ਥਾਂ 'ਤੇ ਇੱਕ ਬਾਡਰ ਹੈ

ਜਿਥੇ ਸਾਡੇ ਹੱਕ ਖ਼ਤਮ ਹੁੰਦੇ ਹਨ

ਪਤਵੰਤੇ ਲੋਕਾਂ ਦੇ ਸ਼ੁਰੂ ਹੁੰਦੇ ਹਨ।

 

ਤੇ ਅਸੀਂ ਹਰ ਤਰ੍ਹਾਂ ਅਜ਼ਾਦ ਹਾਂ ਇਸ ਪਾਰ –

ਗਾਹਲਾਂ ਕੱਢਣ ਲਈ

ਮੁੱਕੇ ਲਹਿਰਾਉਣ ਲਈ

ਚੋਣਾਂ ਲੜਨ ਲਈ

ਸਤਵਰਗਾਂ ਦੀ ਮੁਸਕਾਨ ਚੁੰਮਣ 'ਤੇ

ਕੋਈ ਬੰਦਸ਼ ਨਹੀਂ ਇਸ ਪਾਰ

 

ਤੇ ਇਸ ਤੋਂ ਅੱਗੇ ਹੈ –

ਕਸਬਿਆਂ 'ਚ ਉਡਦੀ ਹੋਈ ਧੂੜ

ਪਲੀਆਂ ਹੋਈਆਂ ਜੂੰਆਂ ਦੇ ਵਾਂਗ

ਰੀਂਘਦੇ ਟਰੱਕ ਬੀ.ਐਸ.ਐਫ਼. ਦੇ

***

(3.11.1972)