2. ਜ਼ੁਰਮ
ਮੇਰੇ ਦੇਸ ਦਿਓ ਮਜ਼ਦੂਰੋ
ਮੁਰਦਾ, ਵਿੱਚ ਮਸ਼ੀਨਾਂ ਦੇ
ਫਜਰੇ, ਸਿਖਰ ਦੁਪਹਿਰਾਂ, ਸ਼ਾਮੀਂ
ਜਾਨਾ ਪਾਵਣ ਵਾਲਿਓ ਲੋਕੋਂ
ਮਿੱਟੀ ਸੋਨਾ ਕਰਨਿਓਂ ਲੋਕੋ
ਫਿਰ ਵੀ ਭੁੱਖੇ ਮਰਨਿਓਂ ਲੋਕੋ
ਮੇਰਾ ਇੱਕ ਐਲਾਨ ਸੁਣੋ
ਪੂਰੇ ਨਾਲ ਧਿਆਨ ਸੁਣੋ
ਸੰਨ੍ਹੀਆਂ ਹਥੌੜੇ, ਰੰਬੇ ਕਹੀਆਂ
ਕਾਂਡੀ ਤੇਸੀ, ਗੈਂਤੀ ਛੱਡੋ।
ਡਾਂਗਾਂ ਸੋਟੇ, ਛਮਕਾਂ ਛਾਂਟੇ
ਇੱਟਾਂ ਵੱਟੇ ਜੋ ਵੀ ਲੱਭੋ
ਮੇਰੇ ਵੱਲੇ ਲੈ ਕੇ ਨੱਠੋ
ਮੈਨੂੰ ਆ ਕੇ ਮਾਰੋ ਕੁੱਟੋ
ਲਿਖੀਆਂ ਸੱਭੇ ਲਿਖਤਾਂ ਸਾੜੋ
ਮੇਰੇ ਚਿੱਟੇ ਕਾਗਤ ਪਾੜੋ,
ਮੇਰੀ ਆ ਕੇ ਸੰਘੀ ਘੁੱਟੋ।
ਮੇਰਾ ਜੁਰਮ ਵੀ ਸੁਣ ਲਓ ਮੈਥੋਂ
ਮੈਂ ਤੁਹਾਡੇ ਵਿੱਚੋਂ ਹੋ ਕੇ
ਤੁਹਾਡੇ ਵੱਲ ਦੀ ਗੱਲ ਨਈਂ ਕਰਦਾ।
ਮੈਂ ਤੁਹਾਡਾ ਮੁਜਰਮ ਜੇ !!
ਮੈਂ ਤੁਹਾਡਾ ਮੁਜਰਮ ਜੇ !!
-0-
