8. ਬਾਬਾ ਨਜ਼ਮੀ ਰੋ
ਚੱਲੀ ਗੋਲੀ ਵਿੱਚ ਭਰਾਵਾਂ, ਬਾਬਾ ਨਜਮੀ ਰੋ।
ਕਰ ਕੇ ਵੱਲ ਅਸਮਾਨਾਂ ਬਾਹਵਾਂ, ਬਾਬਾ ਨਜਮੀ ਰੋ।
ਦੋਹਾਂ ਪਾਸੇ ਕਲਮ-ਗੋ ਨੇ
ਇੱਕੋ ਫੁੱਲ ਦੀ ਇਹ ਖੁਸ਼ਬੋ ਨੇ।
ਕਿਸ ਦੀ ਬਹਿ ਕੇ ਪੀੜ ਮਨਾਵਾਂ, ਬਾਬਾ ਨਜਮੀ ਰੋ।
ਚੱਲੀ ਗੋਲੀ ਵਿੱਚ ਭਰਾਵਾਂ, ਬਾਬਾ ਨਜਮੀ ਰੋ।
ਖੋਰੇ ਕਾਹਦੀ ਮਸਤੀ ਸਭ ਨੂੰ
ਭੁੱਲੇ ਸੱਭੇ ਆਪਣੇ ਰੱਬ ਨੂੰ
ਬਣ ਗਏ ਬੰਦੇ ਵਾਂਗ ਬਲਾਵਾਂ, ਬਾਬਾ ਨਜਮੀ ਰੋ।
ਚੱਲੀ ਗੋਲੀ ਵਿੱਚ ਭਰਾਵਾਂ ਬਾਬਾ ਨਜਮੀ ਰੋ।
ਏਧਰ ਵੀ ਹੈ ਮਰਿਆ ਮੇਰਾ
ਓਧਰ ਵੀ ਏ ਮਰਿਆ ਮੇਰਾ।
ਕੀਹਨੂੰ ਪਹਿਲਾਂ ਮੈਂ ਦਫਨਾਵਾਂ ਬਾਬਾ ਨਜਮੀ ਰੋ।
ਚੱਲੀ ਗੋਲੀ ਵਿੱਚ ਭਰਾਵਾਂ ਬਾਬਾ ਨਜਮੀ ਰੋ।
ਖੌਰੇ ਕਿਥੇ ਮਰ ਗਏ ਦਾਨੇ
ਸ਼ੀਸ਼ੇ ਕੋਲੋਂ ਡਰ ਗਏ ਦਾਨੇ
ਕੱਲ੍ਹਾ ਕਿਸਰਾਂ ਮੈਂ ਸਮਝਾਵਾਂ, ਬਾਬਾ ਨਜਮੀ ਰੋ।
ਚੱਲੀ ਗੋਲੀ ਵਿੱਚ ਭਰਾਵਾਂ, ਬਾਬਾ ਨਜਮੀ ਰੋ।
-0-
