6
ਜੀਭਾਂ ਉੱਤੇ ਚੜ੍ਹਦੇ ਪਏ ਨੇ ਸ਼ਿਅਰ ਮਿਰੇ।
ਵਿੱਚ ਦਿਲਾਂ ਦੇ ਵੜਦੇ ਪਏ ਨੇ ਸ਼ਿਅਰ ਮਿਰੇ।
ਪੋਲ ਪਿਆ ਏ ਖੁੱਲ੍ਹਦਾ ਖੌਰੇ ਉਹਨਾਂ ਦਾ,
ਸੁਣ ਸੁਣ ਜਿਹੜੇ ਸੜਦੇ ਪਏ ਨੇ ਸ਼ਿਅਰ ਮਿਰੇ।
ਮਰ ਕੇ ਵੀ ਮੈਂ ਵਿੱਚ ਰਵ੍ਹਾਂਗਾ ਲੋਕਾਂ ਦੇ,
ਆਇਤਾਂ ਵਾਂਗੂੰ ਪੜ੍ਹਦੇ ਪਏ ਨੇ ਸ਼ਿਅਰ ਮਿਰੇ।
ਮੇਰਾ ਕਲਮ ਬਥੇਰਾ ਲੱਖਾਂ ਛਵੀਆਂ ਲਈ,
ਨਾਲ ਹਨੇਰੇ ਲੜਦੇ ਪਏ ਨੇ ਸ਼ਿਅਰ ਮਿਰੇ।
ਕੋਈ ਤੇ ਨਿਕਲੇ ਮੈਨੂੰ ਏਨੀ ਆਖਣ ਲਈ,
ਠੀਕ ਨਿਸ਼ਾਨੇ ਜੜਦੇ ਪਏ ਨੇ ਸ਼ਿਅਰ ਮਿਰੇ।
ਦਿਸਦਾ ਵੀ ਨਾ ਜੇ ਕੋਈ ਹੁੰਦਾ ਮੇਰੀ ਥਾਂ,
ਜਿਸਰਾਂ ਮੈਨੂੰ ਛੜਦੇ ਪਏ ਨੇ ਸ਼ਿਅਰ ਮਿਰੇ।
-0-
