2. ਲੰਬੜਦਾਰ

ਅੱਖਾਂ ਤੋਂ ਮਜ਼ਦੂਰੀ ਵਾਲਾ ਜਾਲਾ ਲਾਹ ਕੇ

ਆਪਣੇ ਅੰਦਰ ਝਾਤੀ ਪਾ ਕੇ

ਲੰਬੜਦਾਰਾ ਸੋਚ ਤੇ ਸਹੀ

ਦਿਲ ਦੀ ਤਖ਼ਤੀ ਪੋਚ ਤੇ ਸਹੀ

 

ਤੈਥੋਂ ਕਿਹੜੀ ਗਲਤੀ ਹੋਈ

ਕਿਹੜੀ ਗੱਲੋਂ

ਕਿਹਨੇ ਤੈਨੂੰ ਸੂਲ ਚੁਭੋਈ

ਕੱਲ੍ਹ ਤੱਕ ਹੱਥ ਸਲਾਮਾਂ ਵਾਲੇ

ਅੱਜ ਕਿਉਂ ਪੱਗ ਨੂੰ ਪੈਂਦੇ ਪਏ ਨੇ

ਕਿਹੜਾ ਜੁਗ ਦਾ ਬਦਲਾ

ਤੈਥੋਂ ਲੈਂਦੇ ਪਏ ਨੇ

 

ਕਾਮੇ ਕਿਉਂ ਨੇ ਵਿਗੜੇ ਵਿਗੜੇ

ਕਿਉਂ ਕਬੂਤਰ ਬਣ ਗਏ ਸ਼ਿਕਰੇ

ਲੰਬੜਦਾਰਾ ਸੋਚ ਤੇ ਸਹੀ

ਦਿਲ ਦੀ ਤਖ਼ਤੀ ਪੋਚ ਤੇ ਸਹੀ

 

ਮਾੜੇ ਆਨੇ ਟੱਡਣ ਲੱਗੇ

ਮੂੰਹ ਤੇ ਗਾਲ੍ਹਾਂ ਕੱਢਣ ਲੱਗੇ

ਚੌਧਰ ਤੇਰੀ ਮੁੱਕਣ ਲੱਗੀ

ਵਗਦੀ ਗੰਗਾ ਸੁੱਕਣ ਲੱਗੀ

ਮਹਿਲ ਮੁਨਾਰੇ ਡਿੱਗਣ ਲੱਗੇ

ਖੌਰੇ ਹੋਰ ਕੀ ਹੋਣਾ ਅੱਗੇ

ਲੰਬੜਦਾਰਾ ਸੋਚ ਤੇ ਸਹੀ

ਦਿਲ ਦੀ ਤਖ਼ਤੀ ਪੋਚ ਤੇ ਸਹੀ