19
ਕਿਉਂ ਧਰਨਾ ਏਂ ਅੱਗੇ ਬੁੱਤ ਇਬਾਦਤ ਲਈ।
ਲਾਜ਼ਿਮ ਤੇ ਨਈਂ ਜੁੱਸਾ ਪਿਆਰ ਮੁਹੱਬਤ ਲਈ।
ਸਾੜ ਕੇ ਮੇਰੇ ਘਰ ਨੂੰ ਆਪਣੇ ਦੁੱਖ ਨਾ ਲੈ,
ਲੱਖਾਂ ਹੋਰ ਤਰੀਕੇ ਯਾਰ ਸ਼ਿਕਾਇਤ ਲਈ।
ਉੱਡ ਜਾਣਾ ਏਂ ਇੱਕ ਦਿਨ ਪੰਛੀ ਸਾਹਵਾਂ ਦਾ,
ਜਿੰਨੀਆਂ ਮਰਜ਼ੀ ਕੰਧਾਂ ਚੁੱਕ ਹਿਫਾਜ਼ਤ ਲਈ।
ਮੰਜ਼ਿਲ ਪੈਰੀਂ ਉਹਨਾਂ ਦੇ ਡਿੱਗ ਪੈਂਦੀ ਏ,
ਜਿਹਨਾਂ ਕਦੇ ਨਈਂ ਵੇਖੇ ਵਕਤ ਰਿਆਜ਼ਤ ਲਈ।
ਇੱਕੋ ਘਰ ਦੇ ਬੰਦੇ ਪਾੜੀ ਜਾਨਾ ਏਂ,
ਤੈਨੂੰ ਕਿਹਨੇ ਚੁਣਿਆ ਏਸ ਸ਼ਰਾਰਤ ਲਈ।
ਮੇਰਾ ਸਿਰ ਤੇ ਲੱਥਾ ਵਿੱਚ ਹਨੇਰੇ ਦੇ,
ਕਿੱਥੇ ਲੈ ਕੇ ਆਵਾਂ ਲੋਕ ਸ਼ਹਾਦਤ ਲਈ।
'ਬਾਬਾ' ਮੇਰਾ ਨਿੱਤ ਸਲਾਮ ਏ ਉਹਨਾਂ ਨੂੰ,
ਲੜਦੇ ਪਏ ਨੇ ਜਿਹੜੇ ਕਲਮ ਸਦਾਕਤ ਲਈ।
-0-
