11
ਇਸ ਧਰਤੀ 'ਤੇ ਹੁਣ ਤੱਕ ਮੈਨੂੰ ਦਿਸੀਆਂ ਜਾਤਾਂ ਦੋ।
ਇੱਕ ਦਾ ਨਾਂ ਏ 'ਨੇਰਾ 'ਬਾਬਾ', ਇੱਕ ਦਾ ਨਾਂ ਏ ਲੋਅ।
ਤੇਰੇ ਅੱਗੇ ਨਖ਼ਰਾ ਕਾਹਦਾ ਤੇਰੇ ਅੱਗੇ ਅੜੀਆਂ ਕੀ,
ਅਸੀਂ ਆਂ ਤੇਰੇ ਅੰਨ੍ਹੇ ਢੱਗੇ, ਜਿੱਥੇ ਮਰਜ਼ੀ ਜੋ।
ਉਹਦੇ ਨਾਲ ਖਲੋ ਕੇ ਆਪਣਾ ਕੀ ਮੈਂ ਰੰਗ ਵਿਖਾਂ,
ਕਿੱਥੇ ਚੰਨ ਦਾ ਟੋਟਾ ਯਾਰੋ, ਕਿੱਥੇ ਬੁਝਿਆ ਚੋਅ।
ਅੱਜ ਵੀ ਮਰਨਾ, ਕੱਲ ਵੀ ਮਰਨਾ, ਮਰ ਕੇ ਛੁੱਟਣੀ ਜਾਨ,
ਜਦ ਤੱਕ ਸਾਹ ਨੇ, ਵਿੱਚ ਮੈਦਾਨੇ, ਅਣਖਾਂ ਨਾਲ ਖਲੋ।
ਉਸ ਦਿਨ ਮੇਰੇ ਉੱਤੇ ਰੱਬਾ, ਸੁੱਟੇ ਅੱਗ ਅਸਮਾਨ,
ਜਿਸ ਦਿਨ ਲੋੜਾਂ ਪਿੱਛੇ ਆਪਣਾ ਸ਼ੀਸ਼ਾ ਲਵਾਂ ਲੁਕੋ।
ਅੱਜ ਵੀ ਨਈਂ ਜੇ ਕੱਢਣ ਦਿੱਤਾ, ਮੈਨੂੰ ਦਿਲ ਦਾ ਸਾੜ,
ਅੱਜ ਵੀ ਮੇਰੇ ਸੱਜਣਾ ਕੀਤਾ, ਮੇਰੇ ਨਾਲ ਧਰੋਹ।
ਜ਼ਾਲਿਮ ਲੋਕਾਂ ਅੱਗੇ ਕਰਦੇ, ਝੱਲੇ ਰਹਿਮ-ਅਪੀਲ,
ਕੰਡਿਆਂ ਵਿੱਚ ਲੱਭਦੇ ਪਏ ਨੇ, ਫੁੱਲਾਂ ਜਹੀ ਖੁਸ਼ਬੋ।
ਅੱਪੜ ਗਏ ਨੇ ਬੁੱਲ੍ਹੀਆਂ ਤੀਕਰ, 'ਬਾਬਾ' ਦਿਲ ਦੇ ਚਾਅ,
ਸੁਫਨਾ ਸੱਚ ਕਰਾਂ ਮੈਂ ਆਪਣਾ ਮੇਰੇ ਨਾਲ ਖਲੋਅ।
-0-
