24
ਵੇਖ ਲਏ ਤੂੰ ਕਾਰੇ ਯਾਰ, ਅਮਰੀਕਾ ਦੇ ।
ਹੁਣ ਤੇ ਨਾ ਜਾ ਦਵਾਰੇ ਯਾਰ ਅਮਰੀਕਾ ਦੇ ।
ਕਰ ਦਿੱਤਾ ਏ ਆਪ ਨਿਤਾਰਾ ਵੇਲੇ ਨੇ,
ਮੇਰੇ ਬਾਝੋਂ ਸਾਰੇ ਯਾਰ ਅਮਰੀਕਾ ਦੇ ।
ਤੈਨੂੰ ਲੱਭ ਨਈਂ ਸਕਦਾ ਕੋਕਾ ਸੋਨੇ ਦਾ,
ਨਿਕਲੇ ਨੇ ਸੁਨਿਆਰੇ ਯਾਰ ਅਮਰੀਕਾ ਦੇ।
ਸਾਡੇ ਉੱਤੇ ਇਸਰਾਂ ਹੁਕਮ ਚਲਾਉਂਦਾ ਏ,
ਜਿਸਰਾਂ ਅਸੀਂ ਮੁਜਾਰੇ, ਯਾਰ ਅਮਰੀਕਾ ਦੇ।
ਮਿੱਟੀ ਹੋ ਗਈ ਅੰਦਰੋਂ ਹਾਲਤ 'ਅਰਬਾਂ' ਦੀ,
ਹੋ ਗਏ ਵਾਰੇ ਨਿਆਰੇ ਯਾਰ ਅਮਰੀਕਾ ਦੇ।
ਤੇਰਾ ਜਿਸਰਾਂ ਕੈਦਾ ਪੜ੍ਹੇ ਸੱਦਾਮ ਹੁਸੈਨ,
ਜਿਹਨਾਂ ਪੜ੍ਹੇ ਸਿਪਾਰੇ ਯਾਰ ਅਮਰੀਕਾ ਦੇ।
ਹੂੰਝ ਰਿਹਾ ਏ ਇੱਕ ਭਰਾ ਦੀ ਦੌਲਤ ਨੂੰ,
ਇੱਕ ਤੇ ਚੱਲਦੇ ਘਾਰੇ ਯਾਰ ਅਮਰੀਕਾ ਦੇ।
-0-
