28
ਇੱਕ ਦੂਜੇ ਨੂੰ ਆਪਣਾ ਜ਼ੋਰ ਵਿਖਾਣ ਪਏ ।
ਬਾਬਾ ਨਜਮੀਂ ਕੁੱਕੜ-ਖੇਹ ਉਡਾਣ ਪਏ।
ਗੱਡੇ ਪਿਆ ਗਵਾਂਢੀ ਪੈਰ ਮਸ਼ੀਨਾਂ ਦੇ,
ਏਧਰ ਮਾਰ ਭਰਾਵਾਂ ਨੂੰ ਦਫਨਾਣ ਪਏ ।
ਵਿਹੜੇ ਦੇ ਵਿੱਚ ਕਰ ਕੇ ਹੱਥੀਂ ਕੰਧ ਖੜੀ,
ਓਧਰ ਵੀ ਤੇ ਏਧਰ ਵੀ, ਪਛਤਾਣ ਪਏ।
ਜੁੱਸੇ ਉੱਤੋਂ ਲਾਹ ਕੇ ਵਰਦੀ ਫਰਜ਼ਾਂ ਦੀ,
ਮੇਰੇ ਸ਼ਹਿਰ ਦੇ ਰਾਖੇ ਸੰਨ੍ਹਾਂ ਲਾਣ ਪਏ ।
ਛੱਡ ਗਿਆਂ ਵਾਂ ਆਪਣੇ ਹਾਣੀ ਪਿੱਛੇ ਮੈਂ,
ਮੇਰੇ ਕੋਲੋਂ ਅਗਲੇ ਵੀ ਘਬਰਾਣ ਪਏ।
ਵੱਲ ਅਮਰੀਕਾ ਆਗੂ ਇਸਰਾਂ ਜਾਂਦੇ ਨੇ,
ਜਿਸਰਾਂ ਹਾਜੀ ਕਾਹਬੇ ਵੱਲੇ ਜਾਣ ਪਏ।
ਮੈਂ ਵੀ ਉਹਨਾਂ ਵਿੱਚੋਂ ਜਿਹੜੇ 'ਬਾਬਾ' ਜੀ,
ਫਲ ਵੀ ਦੇਂਦੇ ਨਾਲੇ ਪੱਥਰ ਖਾਣ ਪਏ।
-0-
