34
ਸਾਨੂੰ ਸੁੱਖ ਦਾ ਸਾਹ ਨਈਂ ਲੱਭਾ ਤੇਰੇ ਬਾਅਦ ।
ਆਪਣੇ ਘਰ ਦਾ ਰਾਹ ਨਈਂ ਲੱਭਾ ਤੇਰੇ ਬਾਅਦ।
ਕਿੰਝ ਨਾ ਦੇਂਦਾ ਸੂਲੀ ਉੱਤੇ ਤੈਨੂੰ 'ਵਾਜ,
ਸ਼ਹਿਰ 'ਚੋਂ ਇੱਕ ਗਵਾਹ ਨਈਂ ਲੱਭਾ ਤੇਰੇ ਬਾਅਦ।
ਟੋਲੇ ਵੇਖੇ ਯਾਰਾਂ ਦੇ ਮੈਂ ਆਲ-ਦਵਾਲ,
ਆਖਣ ਵਾਲਾ 'ਵਾਹ' ਨਈਂ ਲੱਭਾ, ਤੇਰੇ ਬਾਅਦ।
ਕਦਮ ਕਦਮ ਤੇ ਲੱਖਪਤੀਆਂ ਨਾਲ ਮਿਲਿਆਂ ਮੈਂ,
ਭੁੱਖਾ ਨੰਗਾ ਸ਼ਾਹ ਨਈਂ ਲੱਭਾ, ਤੇਰੇ ਬਾਅਦ।
ਲੱਖਾਂ ਨੂੰ ਠੁਕਰਾਇਆ ਆਪਣੀ ਅਣਖ ਲਈ,
ਐਡਾ ਬੇਪ੍ਰਵਾਹ ਨਈਂ ਲੱਭਾ ਤੇਰੇ ਬਾਅਦ।
ਵਿੱਚ ਹਨੇਰੇ ਬੈਠਾ ਵਾਂ ਮੈਂ ਏਸੇ ਲਈ,
ਸੱਜਣਾਂ ਵਿੱਚ ਵਸਾਹ ਨਈਂ ਲੱਭਾ ਤੇਰੇ ਬਾਅਦ।
ਤਾਹੀਓਂ ਸਾਨੂੰ ਆਉਂਦਾ ਪਿਆ ਏਂ 'ਬਾਬਾ' ਰੋਣ,
ਖੁਰਲੀ ਵਿੱਚੋਂ ਘਾਹ ਨਈਂ ਲੱਭਾ, ਤੇਰੇ ਬਾਅਦ।
-0-
