ਹੱਸ-ਹੱਸ ਆਖਣ ਕੜੀਆਂ-ਬਾਲੇ ਅੱਖਾਂ ਨੂੰ

ਲੱਗ ਜਾਵਣ ਤੇ ਕੌਣ ਸੰਭਾਲੇ ਅੱਖਾਂ ਨੂੰ

 

ਰੱਖਿਆ ਕੀ ਏ ਖੌਰੇ ਉਹਦੇ ਸੀਨੇ ਵਿੱਚ

ਦਿਲ ਹੋਵੇ ਤੇ ਕਿੱਸਰਾਂ ਟਾਲ਼ੇ ਅੱਖਾਂ ਨੂੰ

 

ਪਹਿਲੋਂ ਅੱਖਾਂ ਹੋਣ ਹਵਾਲੇ ਅੱਖਾਂ ਦੇ

ਬਾਅਦ 'ਚ ਅੱਖਾਂ ਦੇਣ ਹਵਾਲੇ ਅੱਖਾਂ ਨੂੰ

 

ਸੱਜਣ ਅੱਖਾਂ, ਅੱਖਾਂ ਵਿੱਚ ਨਿਚੋੜ ਗਿਆ

ਐਵੇਂ ਤੇ ਨਹੀਂ ਮਿਲੇ ਉਜਾਲੇ ਅੱਖਾਂ ਨੂੰ

 

ਸਾਰੇ ਸੁਫ਼ਨੇ ਸੜ ਕੇ ਕੋਲਾ ਹੋ ਗਏ ਨੇਂ

ਅੱਗਾਂ ਲਾ ਗਏ ਦੀਵੇ ਬਾਲ਼ੇ ਅੱਖਾਂ ਨੂੰ

 

'ਤਾਹਿਰਾ' ਕਾਣੀ ਅੱਖੀਂ ਵੇਂਹਦੇ ਰਹਿੰਦੇ ਨੇ

ਮੰਜ਼ਰ ਓਹੋ ਵੇਖੇ ਭਾਲ਼ੇ ਅੱਖਾਂ ਨੂੰ